OÉ-CUSSE, 20 Janeiru 2025 (TATOLI) – Sekretáriu Rejionál ba Asuntu Administrasaun, André Lao, reprezenta Prezidente Autoridade, hamutuk ho ekipa Institutu Nasionál Seguransa Sosiál (INSS) no Banku Nasionál Komérsiu Timor-Leste (BNCTL), segunda ohin, abertura pagamentu pensaun sosiál ba ferik-katuas no Ema ho Defisiénsia (EhD) hamutuk 744 iha suku Abani sub-rejiaun Pássabe.
“Osan ne’ebé ohin imi sim husi Governu mak fó atu halo saida? Atu imi uza hola hahán ne’ebé di’ak, labele uza atu halo festa ka halo fali lia ka fó tan ba ema seluk hodi halo impresta,” André Lao, ko’alia iha ámbitu sesaun abertura, ohin.
Notísia relerevante:Semana oin, INSS abertura pagamentu pensaun sosiál iha Pássabe
Koordenadór INSS Oé-Cusse, Teotoniu Tolan, informa, kaléndáriu pagamentu iha loron segunda 20-21 Janeiru 2024 ba benefisiáriu iha sub-rejiaun Pássabe 927 mai husi suku rua, suku Abani 744, Malelat 183.
“Ohin, ita abertura iha sub-rejiaun Pássabe, pagamentu sei hala’o durante loron rua ohin iha suku Abani ba benefiksiáriu 744, aban ita ba fali suku Malelat, kuarta no kinta semana ne’e ita kontinua halo fali pagamentu iha sub-rejiaun Nítibe.” Nia dehan.
Totál benefisiáriu ba pensaun sosiál iha Oé-Cusse hamutuk 7.055. ne’ebé kaléndáriu pagamentu iha loron segunda 20-21 Janeiru 2024 ba benefisiáriu iha sub-rejiaun Pássabe 927 mai husi suku rua, suku Abani 744 Malelat 183.
Iha loron 22-24 Janeiru 2025, ekipa sei halo pagamentu iha sub-rejiaun Nítibe ba benefisiáriu 1.454, mai husi suku lima mak hanesan, suku Bene-Ufe 263, Suni-Ufe 188, Usitako 342, Lela-Ufe 409 no suku Ban-Afi 252.
Iha loron 27-29 Janeiru 2025, ekipa kontinua ba halo pagamentu iha sub-rejiaun Oésilo ba benefisiáriu 1.681, mai husi suku tolu mak hanesan, suku Bobometo 1.009, Usitasa’e 528 no suku Usitaqueno 144.
Pagamentu ikus iha sub-rejiaun Pante Makasar hahú iha loron 30 Janeiru to’o 10 Fevereiru 2025 ba benefisiáriu 2.993, mai husi suku ualu mak hanesan, suku Naimeko 475, Bobokase 141, Cunha 523, Lalisuk 260, Taiboko 643, Costa 533 Lifau 268 no suku Nípani 150.
“Kaléndariu sei iha mudansa tanba agoa tempu udan, dalaruma estrada aat udan la para, entaun ita sei adia, no fatin sei konsentra iha sede suku ida-idak,” nia informa.
Entretantu, durante pagamentu hetan akompañamentu direita husi Provedória Direitu Umanu no Justisa (PDHJ) no apoia mós husi Polísia Nasionál Timor-Leste.
Notísia relevante:MSSI koordena asuntu tolu inklui pensaun sosiál ho Autoridade RAEOA
Jornalista: Abílio Elo Nini
Editór: Florencio Miranda Ximenes
