OÉ-CUSSE, 16 Janeiru 2025 (TATOLI) – Koordenadór Instituto Nasionál Seguransa Sosiál (INSS) iha Rejiaun Administrativa Espesiál Oé-Cusse Ambeno (RAEOA), Teotonio Tolan, fó-sai kaléndariu kona-ba pagamentu pensaun sosiál ferik-katuas sei abertura uluk iha sub-rejiaun Pássabe iha loron segunda, 20 Janeiru 2025.
“Horisehik ami simu ona oráriu pagamentu husi banku BNCTL ba benefisiáriu hamutuk 7.055, ne’ebé ohin ami hahú halo distribuisaun ba suku 18 no aneksa kedas ho informasaun prosesu pagamentu kritéria sira atu informa ba benefisiáriu sira, tanba pagamentu ne’e ita sei abertura uluk iha sub-rejiaun Pássabe iha segunda semana oin,” Teotonio Tolan, ba Ajénsia Tatoli iha Oé-Cusse, ohin.
Notísia relevante:MSSI koordena asuntu tolu inklui pensaun sosiál ho Autoridade RAEOA
Kalendáriu pagamentu iha loron segunda, 20 no 21 Janeiru 2025 ba benefisiáriu iha sub-rejiaun Pássabe 927 mai husi suku rua, suku Abani ho benefisiáriu 744 no suku Malelat ho benefisiáriu 183.
Iha loron 22 no 24 Janeiru 2025, ekipa sei halo pagamentu iha sub-rejiaun Nítibe ba benefisiáriu 1.454, maihusi suku lima mak hanesan, suku Bene-Ufe 263, Suni-Ufe 188, Usitako 342, Lela-Ufe 409 no suku Ban-Afi 252.
Iha loron 27-29 Janeiru 2025, ekipa kontinua ba halo pagamentu iha sub-rejiaun Oésilo ba benefisiáriu 1.681, mai husi suku tolu mak hanesan, suku Bobometo 1.009, Usitasa’e 528 no suku Usitaqueno 144.
Pagamentu ikus iha sub-rejiaun Pante Makasar hahú iha loron 30 Janeiru to’o 10 Fevereiru 2025 ba benefisiáriu 2.993, mai husi suku ualu mak hanesan, suku Naimeko 475, Bobokase 141, Cunha 523, Lalisuk 260, Taiboko 643, Costa 533, Lifau 268 no suku Nípani 150.
“Benefisiáriu sira sei simu pensaun sosiál iha kada sede suku ida-idak tanba pagamentu ne’e osan tinan kotuk nian (2024), husi trimestre ikus hahú husi Outubru, Novembru to’o Dezembru,” nia relata.
Benefisiáriu ne’ebé la’o labele ka moras, ekipa pagamentu sei la’o movél liuliu balun ho motorizada, atu ba halo pagamentu direita ba sira-nia hela fatin. Maibé sira-ne’ebé uza ATM bele foti direita iha banku.
“Kritéria nafatin laiha mudánsa importante mak sira-nia dokumentu hanesan eleitorál, billete identidade ka sertidaun RDTL iha,” nia katak.
Durante prosesu pagamentu parte INSS mós konvida Provedória Direitu Umanu no Justisa (PDHJ) no Polísia Nasionál Timor-Leste (PNTL) halo akompanamentu.
Benefisiáriu ho idade 60-69 simu $60 kada fulan, idade 70-80 simu $80 no idade husi 80 ba leten simu $100 kada fulan.
Notísia relevante:RAEOA paga pensaun sosiál faze daruak iha pante Makasar
Jornalista: Abílio Elo Nini
Editór : Florencio Miranda Ximenes
