iklan

EKONOMIA, HEADLINE, MUNISÍPIU, OÉ-CUSSE (RAEOA)

RAEOA paga pensaun sosiál faze daruak iha pante Makasar

RAEOA paga pensaun sosiál faze daruak iha pante Makasar

INSS abertura pagamentu pensaun sosiál iha suku Lalisuk Pante Makasar. Imajen Tatoli/Abílio Elo Nini

OÉ-CUSSE, 18 juñu 2024 (TATOWLI) – Ministériu Solidariédade Sosiál no Inkluzaun (MSSI), liuhusi Institutu Nasionál Seguránsa Sosiál, akompaña husi Sekretária Rejionál Edukasaun no Asuntu Sosiál, tersa ohin, abertura pagamentu pensaun sosiál no ema ho defisiénsia faze daruak hahú uluk iha suku Lalisuk, sub-rejiaun Pante Makasar, Reejiaun Administrativa Espesiál Oé-Cusse Ambeno (RAEOA).

Iha abertura ne’e, Sekretária Rejionál Edukasaun no Asuntu Sosiál, Inácia Tamele, husu ba benefisiáriu sira, osan ne’ebé Governu apoia, uza atu goza direitu hodi hola hahán, no labele uza ba lia.

Tuir nia, tanba osan ne’ebé Governu oferese ba idade 60 to’o 69 simu $60 kada fulan, idade 70 to’o 79 simu $80 kada fulan no idade 80 ba leten simu $100 kada fulan.

“Osan ne’e, ba sira-nia nesesidade rua, uza sosa ai-han ne’ebé ho nutrisaun di’ak no ba konsulta no uza bele ba pasiar iha fatin seluk, no osan ne’e labele fó ba bei-oan uza ba sira-nia nesesidade no halo ba lia, tanba bei-oan ne’e responsbilidade inan-aman nian la’os avo nia responsabilidaede,” nia fó hanoin.

Koordenadór INSS Oé-Cusse, Teotónio Tolan, esplika, atu simu pensaun hirak-ne’e, Institutu Nasionál Seguránsa Sosiál (INSS) halo pagamentu ba benefisiáriu sira ho maneira rua, primeiru halo pagamentu movél ba  benefisiáriu ne’ebé la’o labele,  no pagamentu seluk konsentra iha sede suku idak-idak.

“Maneira pagamentu ne’ebé ami serbisu hamutuk ho banku BNCTL, pagamentu iha sede suku ba sira-ne’ebé la’o labele, ami sei koordena hamutuk hala’o pagamentu movél sei to’o sira-nia hela fatin, tanba inportante osan ne’e tenke to’o duni benfisiáriu ne’ebé simu pensaun sosiál ne’e, ami la autoriza reprezentante, tanba parte INSS ho banku sei hakbesik atendimentu ba benefisiáriu sira-nia rezidénsia,” nia akresenta.

José Corbafo, agradese ba Governu Timor-Leste, tanba kada tinan aumenta pensaun sosiál, atu apoia nesesidade moris moris loron-loron nian.

“Osan ne’e ha’u uza atende uma laran, depois selu ha’u-nia ba eskola no barakliu ba nesesidade família,” ni katak.

Entretantu, totál benefisiáriu pensaun sosiál iha Rejiaun Oé-Cusse Ambeno 7.043 ho nia valór pagamentu millaun $1.627.680.00.

Bazea kaléndariu agamentu dahuluk hahú iha sub-rejiaun Pante Makasar 3.312, tuir mai sub-rejiaun Nítibe 1.417, sub-rejiaun Oésilo 1.570 no pagamentu ikus iha sub-rejiaun Pássabe ba benefisiáriu 744 iha loron 22 jullu.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!