OEKUSI, 06 Fevereiru 2025 (TATOLI)– Autoridade Rejiaun Administrativa Espesiál Oekusi Ambeno (RAEOA) liuhusi Sekretária Rejionál ba Asuntu Administrasaun hamutuk ho Institutu Nasionál Seguransa Sosiál (INSS), kinta ne’e, ensera ona pagamentu ba idozu-invalidés hamutuk 533 iha suku Costa sub-rejiaun Pante Makasar.
Iha biban ne’e, Sekretária Rejionál ba Asuntu Administrasaun, Andre Lao, apela, ba benefisiáriu sira, katak Governu apoia subsidíu hodi sustenta nesesidade moris liuliu ba hola ai-han nutritivu no hadi’a saúde.
Notísia relevante:Semana oin, INSS abertura pagamentu pensaun sosiál iha Pássabe
“Osan ne’ebé Governu fó atu kuida saúde, tanba inan-aman sira-nia kondisaun fiziku no idade labele halo servisu todan, tan ne’e Governu kria subsídiu ne’e, atu asegura sira-nia vida, liuliu atu hola ai-han ne’ebé di’ak atu konsumu, tenke ba konsulta saúde iha fasilidade saúde, no labele servisu todan, tanba Governu fó insentivu ne’e ho objetivu atu hakmaan sira-nia atividade sira-ne’e todan,” nia ko’alia iha sede suku Costa, ohin.
Iha fatin hanesan, Koordenadór INSS Oekusi, Teotónio Tolan, informa pagamentu ne’e hala’o durante loron 15, ne’ebé abertura dahuluk iha Pássabe no ohin ensera iha sub-rejiaun Pante Makasar.
“Durante prosesu pagamentu ne’e, ami tama sai suku no maniera pagamentu ne’e iha sentru sede suku no movél pagamentu ba benefisiáriu sira-ne’ebé moras ka la’o labele, ne’ebé iha mosu fallansu balun naran balun sai, maibé osan la tama no balun naran la sai, entaun problema ne’e ita sei rezolve hafoin pagamentu ne’e ramata sei submete ba nasionál atu haree,” nia dehan.
Xefe suku Costa, Francisco Colo, hateten pagamentu iha suku Costa, prioridade uluk ba aldeia Oétfo ho Lakufoan, mak foin aldeia tolu seluk.
“Ami fó prioridade uluk ba aldeia rua, Oétfo no Lakufoan desizaun ne’e ami foti ho razaun, katak iha segunda 10 Fevereiru sira realiza eleisaun xefe suku, entaun sira simu uluk ohin, aban mak aldeia tolu seluk,” nia afirma.
Totál benefisiáriu ba pensaun sosiál iha Oekusi hamutuk 7.055. komposta husi sub-rejiaun Pássabe 927, sub-rejiaun Nítibe 1.454, sub-rejiaun Oésilo 1.681 no sub-rejiaun Pante Makasar 2.993.
Notísia relevante:Idozu-invalidés 643 iha Taiboko simu ona pensaun sosiál
INSS no BNCTL paga pensaun sosiál ba idozu no invalidés na’in-744 iha RAEOA
Jornalista: Abílio Elo Nini
Editór: Florencio Miranda Ximenes
