OEKUSI, 04 Fevereiru 2025 (TATOLI) –Autoridade Rejiaun Administrativa Espesiál Oekusi Ambeno (RAEOA), liuhusi Sekretária Rejionál Edukasaun no Asuntu Sosiál (SREAS), Inácia Tamele, ofisialmente halo abertura ba pagamentu idozu-invalidés hamutuk 643 Taiboko iha suku Taiboko sub-rejiaun Pante Makasar.
Iha serimónia abertura, membru Autoridade RAEOA ne’e, husu ba idozu sira hotu atu uza osan ne’e ho didi’ak, tanba osan ne’ebé simu hodi sosa nesesidade báziku ne’ebé importante atu hadi’a saúde, nune’e labele sosa fali tua ka ba halo fali lia liuliu asuntu kultura.
Notísia relevante:Semana oin, INSS abertura pagamentu pensaun sosiál iha Pássabe
“Ami mai atu hatene observa direitamente, tanba ohin simu imi nia direitu idozu nian, no ami husu atu bele uza osan ne’e sosa ai-han ne’ebé fó benefisiu ba imi nia saúde hodi bele hetan saúde di’ak nafatin. Dala barak ami haree, imi sosa de’it nesesidade uitoan de’it, depois imi gasta liu osan ba halo fali lia, balun hola tua hemu lanu, maibé loloos labele,” nia dehan iha suku Taiboko.
Sekretária Rejionál ne’e, hato’o agradesimentu ba ekipa INSS, BNCTL no akompaña husi PNTL, mezmu tempu udan, maibé bele kobre suku sira hotu hodi oferese pensaun sosiál ne’e.
“Osan ne’ebé imi simu, atu tulun imi, tanba imi laiha ona forsa atu kaer servisu todan hanesan fila rai no lere toos. Ida-ne’e hanesan apoia solidariedade husi ita-nia Nasaun Timor-Leste atu dignifika ferik no katuas sira-ne’ebé idade 60 ba leten, nune’e bele sente no goja valór independénsia nian iha ita nia Nasaun Timor-Leste. Ami mós hato’o agradese ba ekipa pagamentu maske udan maibé imi esforsa nafatin mai to’o ne’e,” nia agradese.
Iha biban ne’e, Koordenadór Institutu Nasionál Seguransa Sosiál (INSS) iha RAEOA, Teotonio Tolan, relata, pagamementu ne’e abertura dahuluk iha sub-rejiaun Pássabe iha loron 20 Janeiru 2025.
“Tuir kalendáriu ne’ebé aprova pagamentu ne’e, ita hahú husi loron 20 Janeiru no sei ramata iha loron 10 Fevereiru 2025,” nia dehan iha ámbitu ne’e.
Koordenadór INSS ne’e mós aprezenta kona-ba prosesu pagamentu katak benefisiáriu ne’ebé la’o labele ka moras mak ekipa pagamentu sei la’o to’o nia fatin. Maibé sira-ne’ebé uza ATM bele foti direita iha banku. Tanba kritéria laiha mudansa importante mak sira-nia dokumentu hanesan Eleitorál, Billete Identidade ka sertidaun RDTL.
Entretantu, totál benefisiáriu ba pensaun sosiál iha Oé-Cusse hamutuk 7.055. komposta husi sub-rejiaun Pássabe 927, sub-rejiaun Nítibe 1.454, sub-rejiaun Oésilo 1.681 no sub-rejiaun Pante Makasar 2.993.
Notísia relevante:INSS no BNCTL paga pensaun sosiál ba idozu no invalidés na’in-744 iha RAEOA
Jornalista: Abílio Elo Nini
Editór: Florencio Miranda Ximenes
