OEKUSI, 20 Marsu 2025 (TATOLI) – Ekipa husi Institutu Nasionál Seguránsa Sosiál (INSS) hamutuk ho Banku Nasionál Comérsiu Timor-Leste (BNCTL), kuarta ne’e, ensera ona pagamentu pensaun sosiál ba ferik, katuas no Ema ho Defisiénsia (EhD) na’in-1.454 ho susesu mai husi suku lima iha sub-rejiaun Nítibe, Rejiaun Administrativa Espesiál Oekusi Ambeno (RAEOA).
“Ita halo pagamentu loron tolu ba benefisiáriu hamutuk na’in-1.454 iha sub-rejiaun Nítibe horsehik kalan tuku 09:00 remata ona ho susesu, ohin kinta, ita hahú fali iha sub-rejiaun Pássabe ba suku Abani ho Malelat,” Koordenadór INSS Oekusi, Teotoniu Tolan, ba Ajénsia Tatoli,I.P, ohin.
Notísia relevante:INSS ho Autoridade RAEOA halo pagamentu pensaun sosiál ba idozu-invalidés 263
Iha sub-rejiaun Nítibe pagamentu ba aldeia 17 no suku lima, hahú husi suku Bene-Ufe iha loron segunda to’o ramata iha suku Ban-Afi iha loron kuarta 19 Marsu 2025 ne’e.
Nune’e pagamentu hahú husi dadersan tuku 08:00 to’o ramata iha tuku 21:00, tanba ferik-katuas sira entusiázmu hodi hein, nune’e ekipa kontinua to’o remata iha kalan.
“Ita agradese, tanba iha prosesu pagamentu, inan-aman sira no autoridade lokál koopera malu di’ak tebes, balun la konsege foti ita rejista hela tanba fallansu uitoan iha konta bankária, maibe ein-jerálmente situasaun la’o dia’k no kontraladu tanba hetan apoia másimu husi PNTL,” nia hateten.
Durante pagamenu loron tolu hahú husi loron 17 to’o 19 Marsu 2025, konsege rejista benefisiáriu balun konsege simu direitu tanba iha fallansu tékniku ho konta bankária, maibé parte INSS rejista iha lista adisionál atu simu hafoin pagamentu konklui iha Oekusi.
Tuir nia totál totál benefisiáriu ba pensaun sosiál iha Oé-Cusse bazea dadus 2024 rejista 7.055, maibé iha aumenta foun sira hamutuk 670, maibé dadús seidauk junta hamutuk ba kada sub-rejiaun sira.
Notísia relevante:INSS Oekusi rejista reklamante ba subsídiu idozu-invalidés na’in-34
Entretantu, tuir kaléndariu ekipa INSS ho BNCTL halo pagamentu dahuluk iha sub-rejiaun Nítibe ba benefisiáriu 1.454, hahú husi loron 17 to’o 19 Marsu 2025, mai husi suku lima mak hanesan, suku Bene-Ufe 263, Suni-Ufe 188, Usitako 342, Lela-Ufe 409 no suku Ban-Afi 252.
Iha loron 20 to’o 21 Marsu 2025, ekipa kontinua halo pagamentu ba benefisiáriu iha sub-rejiaun Pássabe 927 mai husi suku rua, suku Abani 744 Malelat 183.
Iha loron 24 to’o 26 Marsu 2025, ekipa kontinua ba halo pagamentu tan iha sub-rejiaun Oésilo ba benefisiáriu 1.681, mai husi suku tolu mak hanesan, suku Bobometo 1.009, Usitasa’e 528 no suku Usitaqueno 144.
Pagamentu ikus iha sub-rejiaun Pante Makasar hahú iha loron 27 Marsu to’o 07 Abríl 2025 ba benefisiáriu 2.993, mai husi suku ualu mak hanesan, suku Naimeko 475, Bobokase 141, Cunha 523, Lalisuk 260, Taiboko 643, Costa 533 Lifau 268 no suku Nípani 150.
Notísia relevante:Idozu na’in-haat devolve rihun $2-resin ba Estadu tanba falsifika dokumentu
Jornalista: Abílio Elo Nini
Editór: Florencio Miranda Ximenes
