Top

Tribunál halo julgamentu ba Isac Soares nia mate iha Beduku

Tribunál Judisiál Primeira Instánsia Dili. Imajen TATOLI/António Daciparu

DILI, 24 Outubru 2025 (TATOLI)–Tribunál Judisiál Primeira Instánsia Dili (TJPID), Sesta ne’e, halo julgamentu ba arguidu AdD ne’ebé suspeitadu baku mate matebian Isac Soares iha área Beduku, Munisípiu Likisá, iha fevereiru 2025.

Iha sala julgamentu, arguidu deklara ba juíz koletivu katak, momentu ne’ebá arguidu ho vítima diskute malu tanba de’it projeitu no arguidu ho vítima hadau malu besi kanu ida, nune’e Isac Soares mak tuku uluk arguidu hodi monu ba rai.

Arguidu deklara, bainhira nia monu tiha ba rai no hader, mai haree hetan besi ida, no arguidu foti besi ne’e baku dala-ida ba iha vítima nia ulun parte kotuk.

Arguidu deklara tan, depois vítima monu tiha, arguidu la hatene vítima mate ka lae, tanba tauk, arguidu halai kedan bá Eskuadra Polísia ne’ebé besik hodi ba aprezenta-an.

Notísia relevante : PSIK identifika feto ida ne’ebé komete krime infantisida iha Beduku

Hafoin Tribunál rona tiha depoimentu husi arguidu, nune’e konsidera katak arguidu konfesa parsiál ba faktu ne’ebé iha, tanba ne’e husu Ministériu Públiku atu tama kedan ba iha faze alegasaun.

Alegasaun

Iha faze alegasaun ne’e Prokuradór Nelson Magno, alega hodi husu Tribunál atu aplika pena Prizaun ba iha arguidu.

Tanba arguidu nia hahalok ne’e priense elementu krime ne’ebé previstu no punidu iha artigu 138 husi Kódigu Penál Timor-Leste.

Razaun Prokuradór Titulár ne’e solisita ba atu aplika pena prizaun tanba tuir MP hafoin rona depoimentu arguidu nia ne’ebé aprezenta iha prosesu ne’e arguidu deklara parsiál ba faktu katak nia mak baku duni matebian ho besi iha ulun to’o vítima Isac Soares hakotu iis, maski arguidu konsente katak aktu sira hanesan ne’e krime maibé arguidu kontinua prátika krime ne’e.

Enkuantu parte defeza, Advogadu Fernando da Costa husu Tribunal, atu kondena arguidu ho pena prizaun menus husi tinan-ualu tanba arguidu konfesa parsiál ba faktu.

Akuzaun

Tuir akuzaun husi MP nia ne’ebé lee sai iha sala julgamentu katak, Tuir faktu, iha loron 28 Fevereiru 2025 pur volta tuku 08:00 dader, fatin iha Beduku, Tibar Likisá, vítima Isac Soares hanesan Xefe ekipa halo morru kompañia Joni Ze, duun ba arguidu naok teen no tolok nia inklui nia inan aman.

Arguidu ho vítima diskute malu hodi hadau malu besi ulir no arguidu mak f    oti duni besi hodi baku dala-ida iha vítima nia ulun to’o hetan kanek no monu ba rai, arguidu mós halai husi fatin akontesimentu ne’e.

Testemuña, Joni Soares, haree ema halai, tanba ne’e nia mós ba iha fatin akontesimentu hodi haree vítima monu hela ba rai, hetan kanek ulun nomós raan sai, tanba ne’e mak sira hein ambulánsia hodi mai foti vítima bá iha Ospitál, maibé labele salva nia vida.

Konsekuénsia husi arguidu baku ne’e rezulta vítima hetan kanek grave iha ulun no halo raan sai barak hodi lakon vida.

Arguidu halo agresaun hasoru vítima, tanba vítima duun nia naok teen no tolok nia inan no aman.

Arguidu hatene katak bainhira lori besi baku vítima nia ulun bele kauza kanek grave no raan sai barak hodi rezulta nia mate, maibé arguidu halo nafatin saida mak nia hakarak.

Arguidu halo krime ho livre, deliberada, konsentemente no hatene katak hahalok ne’e proibidu no hetan pena tuir lei, tanba ne’e konsidera arguidu hanesan autór materiál ba krime omisídiu simples, ne’ebé previstu tuir artigu 138 husi kódigu penál.

Hafoin Tribunál halo tiha alegsaun ba kazu ne’e , Tribunal deside marka fali ba loron seluk hodi rona leitura akordaun.

Audiénsia julgamentu ne’e, prezide husi Juíz Fransisca Cabral, José Escurial, Juíz estajiadu na’in-ida, MP reprezenta husi Prokuradór Nelson Magno, arguidu hetan asisténsia legál husi Advogadu Privadu Fernando de Carvalho.

Jornalista     : Natalino Costa

Editora         : Julia Chatarina

Publisidade

Leave a Reply

Latest Post

error: Content is protected !!