Vise PM Kalbuadi atualiza Roteiru Integrasaun Ekonómika iha reuniaun AEC
DILI, 24 Outubru 2025 (TATOLI)–Governu Timor-Leste liuhusi Vise Primeiru-Ministru (PM) no Ministru Koordenadór ba Asuntu Ekonómiku, no Ministru Turizmu no Ambiente, Francisco Kalbuadi Lay atualiza Roteiru Integrasaun Ekonómika Timor-Leste nian durante reuniaun Konsellu Komunidade Ekonómika ASEAN (AEC) nian ne’ebé hala’o iha Kuala Lumpur Convention Center (KLCC), Sesta ne’e.
Reuniaun ne’e partisipa husi Prezidente Konsellu AEC, Tenku Zafrul Tenku Abdul Azis, Ministru Investimentu, Komérsiu no Indústria Malázia inklui Ministru Ekonómiku ASEAN nian.
Reuniaun Konsellu Komunidade Ekonómika ASEAN nian ba dala-26 ida-ne’e dirije husi Governu Timor-Leste liuhusi Vise PM Francisco Kalbuadi Lay, hodi marka Timor-Leste nia partisipasaun formál dahuluk iha nível AEC.
Molok Vise PM ne’e hahú, ba dahuluk lori Governu Timor-Leste nia naran hato’o apresiasaun ba Governu Malázia no Prezidente ba sira-nia ospitalidade no arranju exelente sira ba asembleia importante ida-ne’e iha Kuala Lumpur.
Notísia relevante : Prezensa líder EUA no Xina iha simeira hanesan teste ba ASEAN nia kredibilidade
Vise PM ne’e konsidera enkontru ne’e marka pasu importante ida, ba oin iha Timor-Leste nia jornada ba adezaun tomak ba ASEAN.
“Ne’e hatudu ami-nia kompromisu maka’as atu serbisu besik ho nasaun hotu-hotu iha rejiaun ne’e no ami-nia aspirasaun atu kontribui ba Komunidade ASEAN ne’ebé pasífika, estável, no prósperu,” Vise PM Francisco Kalbuadi Lay hato’o asuntu ne’e liuhusi nia diskursu.
Nia dehan, Timor-Leste haksolok atu fahe Roteiru Integrasaun Ekonómika planu prátiku ida ne’ebé trasa, oinsá aliña polítika no sistema nasionál sira ho padraun ASEAN nian.
“Atu apoia prosesu ida-ne’e, ami finaliza hela ami-nia Roteiru Implementasaun AEC Nasionál 2026–2030, enkuadramentu ida ba tinan-lima ne’ebé sei ajuda ami tau ami-nia kompromisu sira iha asaun pasu ba pasu, hahú ho akordu ekonómiku xave sira ASEAN nian,” nia katak.
Vise PM hatutan : “Ami haksolok atu hato’o katak Timor-Leste halo ona progresu konstante hodi kumpre meta sira ne’ebé estabelese ona iha Roteiru ba Adezaun Plena iha ASEAN. Ho kontinuasaun apoiu no asisténsia téknika husi Estadu-membru ASEAN no Sekretariadu ASEAN, ami haforsa ona ami-nia kapasidade iha área importante sira hanesan komérsiu, investimentu, no governasaun ekonómika.”
Iha loron 21 Outubru 2025, Timor-Leste konklui ho susesu nia negosiasaun Oferta Asesu ba Merkadu tuir Akordu Komérsiu Sasan ASEAN nian (ATIGA). Ho realizasaun ida-ne’e, Timor-Leste oras ne’e kompleta ona negosiasaun MAO hotu-hotu tuir akordu prinsipál ekonómiku ASEAN nian. Ida-ne’e marka pasu boot ida ba oin iha ami nia dalan ba adezaun tomak.
“Ami agradese tebes ba Estadu-membru ASEAN hotu-hotu ba ita-boot sira-nia apoiu, orientasaun, no kooperasaun laran-luak durante viajen ida-ne’e,” Governante ne’e katak.
Timor-Leste nia integrasaun ba ASEAN la’ós de’it kona-ba tama iha organizasaun ida maibé kona-ba fahe vizaun no futuru komún.
Timor-Leste fahe ASEAN nia valór sira kona-ba pás, kooperasaun, no dezenvolvimentu sustentável, no ami prontu atu kontribui ho ativu ba objetivu sira-ne’e. Tanba ne’e, reprezenta Governu no povu Timor-Leste.
“Ha’u hato’o dala-ida tan ami-nia apresiasaun onestu ba apoiu morál, tékniku, no materiál ne’ebé kontinua fó hosi Estadu-membru ASEAN sira. Ami prontu atu serbisu hamutuk ho ita-boot sira hotu hodi hametin unidade, reziliénsia, no prosperidade Komunidade ASEAN nian,” Kalbuadi katak.
Governu Timor-Leste iha konfiansa katak adezaun Timor-Leste nian sei lori enerjia foun no kompromisu ba objetivu kompartilladu ba Sudeste Aziátiku ida ne’ebé pasífiku, inkluzivu, no dinámiku.
TATOLI
