Adere ba ASEAN: Timor-oan presiza hamutuk hodi garante páz no estabilidade
KOVALIMA, 27 Outubru 2025 ( TATOLI)– Vise-Ministru Administrasaun Estatál, Jacinto Rigoberto, hateten Timor-Leste (TL) adera ona ba organizasaun ASEAN, hanesan matadalan ba dezenvolvimentu nasionál, nune’e ne’ebé iha nia pilár importante tolu mak hanesan, pilár polítika, ekonómiku no pilár sosiu kulturál, tanba ne’e presiza garante páz no estabilidade.
Tuir nia, Timor-Leste sai membru plenu ba ASEAN tanba esforsu koletivu husi lideransa no povu Timor-Leste tomak hahú husi tempu rezisténsia to’o ohin sai realidade.
“Timor-Leste (TL) sai ona membru plenu ASEAN ne’e iha pilár boot tolu husi komunidade ASEAN maka sei sai matadalan ba ita-nia dezenvolvimentu nasionál. Hanesan pilár polítika, ekonómiku no sosiu kulturál”, Vise-Ministru Administrasaun Estatál, Jacinto Rigoberto, hato’o liuhosi nia diskursau, bainhira selebra adesaun Timor-Leste ba ASEAN, iha Kampu Ladi Kovalima.
Governante ne’e esplika, pilár ba dahuluk haree ba polítikaASEAN atu hametin pás no estabilidadeba, daruak ekonómiku ASEAN no sosiu kulturál ASEAN.
Ho adesaun ofisál halo nasaun sente orgullu, maibé ho lideransa no povu iha obrigasaun foun atu kontinua prepara Timor-Leste fó kontribuisaun sustantivu pás no estabilidade no dezenvolvimentu sustentavel iha rejiaun ida-ne’e.
Sai ona membru ASEAN hanesan marka istória no previleziu boot tanba nasaun 10, riku husi Timor-Leste bele simu TL sai membru ASEAN.
TL nasaun kiik ne’ebé maka foin dezenvolve nia ekonómia, nune’e tenke servisu maka’as atu hametin instituisaun, hari’i infraestrutura no eduka-oan no negosiánte sira sai kompetetivu liu hodi la depende ba ema seluk, maibé depende ba unidade, servisu maka’as no rejilénsia
Iha sorin seluk, Prezidente Autoridade Munisípiu Kovalima, Miguel Armada Cardoso, reforsa, Timor Leste adera ba ASEAN iha vantajen maka haree ba polítika no seguransa. Tanba TL nasaun viziñu no Indonézia no Austrália no haree mós ba setór ekonómiku no kulturál
Haree ba setór kulturál sidadaun indonézia no sidadaun Timor-Leste ne’e ba mai ita ida-de’it tanba bazeia ba istória olanda no Portugál maka fahe, ita nune’e haree ba sosiu kulturál labele fahe malu”, nia dehan.
Timor-Leste marka istória adera ba ASEAN hala’o prosesu ne’ebé maka la fasíl tanba esforsu husi lidér sira hanesan Prezidente Repúblika José Ramos Horta, Primeiru Ministru, Kay-Rala Xanana Gusmão no mós husi lidér sira seluk.
Notisia relevante:Timor-Leste adere ba ASEAN, Lentil: Mehi tama ASEAN dezde 1974 la saugati
Jornalista:Celestina Teles
Editór:Florencio Miranda Ximenes
