MAE avalia lakuna iha implementasaun kompeténsia públika iha Bobonaru
BOBONARU, 27 Outubru 2025 (TATOLI) – Ministériu Administrasaun Estatál (MAE), liuhusi Diresaun Nasionál Apoiu Instalasaun Munisipál realiza atividade ida hodi reafirma implementasaun kompeténsia desentralizada sira iha domíniu públiku no regulamentu konsellu konsultivu munisipál no regra funsionamentu asembleia postu administrativu iha Bobonaru.
Reprezentante Diretór Nasionál Apoiu Fasilidade Munisipál, Castelo de Carvalho, esplika katak atividade ne’e ho objetivu atu munisípiu hotu komprende no implementa loloos kompeténsia sentralizada sira, tuir polítika ne’ebé estabelese ona, tanba ekipa teknika sira deskobre iha lakuna balu ne’ebé presiza hadi’ak hamutuk.
“Ami mai iha ne’e la’ós atu halo palestra, maibé atu enkoraja ema hotu halo reflesaun ba serbisu ne’ebé hala’o ona. Iha tinan kotuk, ekipa téknika identifika lakuna ki’ik balun ne’ebé presiza atu rezolve, no agora ami reafirma ida-ne’e atu garante implementasaun ne’ebé ótimu”, Castelo de Carvalho dehan iha salaun Maria Tapó, ohin.
Nia hatutan avaliasaun ne’e hola parte mós iha preparasaun ba implementasaun avaliasaun kondisaun mínima, ne’ebé ajenda ona ba tinan 2026, hanesan polítikamente determina ona.
“Hahú iha tinan 2026, ita hakarak ka lakohi sei halo avaliasaun kondisaun mínima ida. Munisípiu balun bele hakat ba podér lokál, tanba ne’e importante ba ita atu prepara sedu”, nia subliña
Diresaun Nasionál Apoiu Instalasaun Munisipál nian hein katak atividade ne’e sei hametin koordenasaun entre governu sentrál no governu sidade sira, no garante katak funsaun administrasaun públika hala’o ho efetivu no akuntabilidade.
Sekretáriu Autoridade Munisípiu Bobonaru ba Asuntu Administrasaun no Finansa, Domingos da Costa, konsidera atividade ne’e importante tebes tanba hanesan kritéria ida ba avaliasaun kondisaun mínima.
“Saida mak ita halo ona, saida mak seidauk halo, maibé iha liu ba halo tiha avaliasaun mai ita. Iha buat balu mak ita seidauk prienxe kritéria, se liu ba ne’e mak hato’o mai ita dehan katak tenke halo mak ita halo ona, katak ita prienxe ona kriteria, más ita seidauk halo ne’e tanba saida, orsida bele hato’o hotu iha ne’e para depois preokupasaun ne’e ita haree hamutuk”, katak.
Atividade ne’e sei realiza durante loron tolu hodi enbolve diretór servisu munisipál sira, inklui administradór postu administrativu neen.
Notísia relevante: Bobonaru halo reflesaun kona-ba progresu implementasaun kompeténsia munisípál
Jornalista: Sergio da Cruz
Editora: Maria Auxiliadora
