DILI, 27 Outubru 2025 (TATOLI)-Sekretáriu Estadu Formasaun Profisionál no Empregu (SEFOPE), Rogério Mendonça, garante transparénsia ba vaga Empregadór Sazonál Rekoñesidu (RSE) Nova Zelándia nian.
Governante ne’e hato’o asuntu ne’e liga ba preokupasaun públika ba anúnsiu rezultadu kandidatu sira-ne’ebé pasa iha selesaun dokumentu ba vaga referida.
“Primeiru mak ita tenke garante transparénsia, no ida fali, ita tenke garante ba empregadór sira no ba Governu Nova Zelándia katak ita-nia kandidatu joven sira iha abilidade, atitude no kondisaun saúde di’ak”, governante ne’e hato’o iha Parlamentu, ohin.
Nune’e, empregadór sira mós fiar Timor-Leste iha esperiénsia hodi simu númeru traballadór ne’ebé boot no bele mós konvense liuhusi mobilidade laborál ne’ebé Timor-Leste haruka ona traballadór bá Austrália no nia númeru agora atinje ba 2.800.
“Ita mós tenke fahe ida-ne’e, serbisu hamutuk ho Governu Austrália, haruka ona traballadór bá hodi konvense sira simu ita-nia traballadór iha futuru”, dehan.
Nia esplika katak SEFOPE fasilita de’it prosesu rekrutamentu no kona-ba atu hili traballadór ne’e parte empregadór mak deside rasik.
Lembra katak, iha 20 Outubru, SEFOPE liuhusi Diresaun Nasionál Empregu Esteriór anunsiu rezultadu ba kandidatu hamutuk na’in-2.186, ne’ebé kompostu husi mane 1513 no feto 640 mak pasa iha prosesu selesaun dokumentu vaga RSE Nova Zelándia.
Anúnsiu ne’ebé halo bazeia ba rezultadu selesaun dokumentu ne’ebé halo durante ne’e husi kandidatu sira submete dokumentu hamutuk 20.859.
Notísia relevante: https://tatoli.tl/2025/10/20/sefope-anunsia-kandidatu-2-186-pasa-selesaun-dokumentu-ba-vaga-online-nova-zelandia/
Jornalista: Nelson de Sousa
Editora: Maria Auxiliadora
