BOBONARU, 28 Outubru 2025 (TATOLI)-Komunidade sira iha suku Ilat-laun, postu administrativu Bobonaru, dadaun ne’e hasoru problema falta bee-moos atu responde ba nesesidade loroloron nian.
Rezidente Ilat-laun Maria de Jesus admite katak problema ne’e akontese tinan-tinan bainhira tama ona tempu bailoro.
“Bee kuru dook ne’e ami ferik labele, bee la sai foin sai semana ida ne’e. Bee laiha ami kuru dook iha bee-matan sorin depo’is tun bá kraik. Tanba bee ne’e fulan ida ka rua mai dalaida”, nia informa ba Tatoli, ohin.
Abitante Júlia Vicente Marta rekomenda ba parte kompetente, liuliu Diresaun Servisu Munisipál Água, Saneamentu no Ambiente atu tau-matan ba problema ne’e, tanba kuaze populasaun hela iha parte foho-lolon no dook husi bee-matan.
Nia relata katak problema ne’e akontese, tanba durante tinan barak ona kanalizasaun bee husi bee-matan Tapo nian iis de’it mak to’o iha Ilat-laun.
“Dalaruma bee mai besi mak kotu iha dalan-dalan, bee mai araska. Komunidade ho sira petugas bee ne’e bá hadi’a fali mak bee ne’e mai, se la bá bee la mai, ami sente araska”, Júlia lamenta.
Tuir observasaun jornalista Tatoli iha terrenu, komunidade sira kuru bee no fó tempu ba malu kada ema ida kuru jerigen lima.
Suku Ilat-laun iha aldeia tolu hanesan mak Ilat-laun, ,Tuneru no Purugua ho totál populasaun 2.000-resin no xefe família 400-resin.
Notísia relevante: EDTL, E.P sei implementa PEN ba aldeia haat iha Ai-Asa no Ilat-laun
Jornalista: Sergio da Cruz
Editora: Maria Auxiliadora
