DILI, 23 Outubru 2025 (TATOLI)–Governu liuhosi Ministériu Juventude, Desportu, Arte no Kultura (MJDAK) garante atleta timoroan husi modalidade lima sei gaña medalla bainhira kompete SEA Games iha Thailándia.
Diretór Jerál Desportu MJDAK, João Rodrigues, esplika prosesu preparasaun ba partisipa Timor-Leste iha SEA Games hala’o liuhusi kooperasaun entre MJDAK, Konfederasaun Desportiva Timor-Leste (CDTL-sigla portugeza) no Komité Olímpiku Nasionál Timor-Leste (CONTL-sigla portugeza) ne’ebé deside modalidade lima sai prioridade tanba garante hatudu prestasaun durante partisipa kompetisaun iha Thailándia.
“Modalidade sira-ne’e prioridade husi Governu. Ne’e katak bainhira prioridade entaun sira tenke atinje gaña medalla sira iha SEA Games,” Diretór Jerál Desportu MJDAK informa ba TATOLI iha Otél Lesidere, Kinta ne’e.
João Rodrígues relata Governu fó-sai ezijénsia referida atu CDTL hato’o tutan ba federasaun sira husi modalidade desportu lima ne’e atu prepara másima liután nune’e bele atinje meta hodi rekolla medalla tantu osan-metan, osan-mutin to’o osan-mean.
Notísia relevante: FKTL konsidera atleta SEA Games menus try out
Nia haktuir ho alvu sira-ne’e atleta sira hahú iha karantina iha Otél Ramelau hodi halo preparasaun hanesan treinu, kontrola alimentasaun no disiplina ne’ebé hetan akompañamentu husi tékniku profisionál sira hanesan doutór espesialista no treinadór sira.
“Husu atleta sira tenke disiplina treinu, oras han no deskansa nune’e bele dedika aan tomak hodi hasa’e bandeira nasionál iha SEA Games,” Rodrígues akresenta.
MJDAK kontinua fó motivasaun ba atleta sira hanesan akompaña direta, depozita konfiansa tomak hodi reprezenta Timor-Leste no kompromete atu atribui sertifikadu rekoñesimentu no fó bolsa estudu ba atleta estudante sira no atribui subsídiu tuir regulamentu diploma ministeriál ne’ebé sei deside liuhusi Komisaun Nasionál Desportu.
Entretantu, totál delegasaun Timor-Leste ne’ebé sei partisipa iha SEA Games hamutuk 74 kompostu atleta na’in-53 no pesoál ofisiál inklui treinadór hamutuk 21 ne’ebé maihusi modalidade liman hanesan Atletizmu, Boxe, Taekwondo, Karate-do no Futeból.
Jornalista: Natalino Belo
Editór: Xisto Freitas da Piedade
