KUALA LUMPUR, 28 Outubru 2025 (TATOLI)-Filipina simu martelu prezidénsia ASEAN nian ba tinan 2026 husi Malázia iha serimónia enseramentu Simeira ASEAN ba da-47 no enkontru sira ne’ebé relasionadu iha Sentru Konvensaun Kuala Lumpur nian iha Kuala Lumpur, Malázia, iha loron-tersa ne’e.
Martelu prezidénsia ASEAN nian entrega hosi Primeiru-Ministru Malázia nian, Anwar Ibrahim, ne’ebé prezide ASEAN iha tinan 2025, ba Prezidente Filipina nian, Ferdinand “Bongbong” Romualdez Marcos Jr.
“Hanesan onra ida ba ha’u atu hala’o serimónia entrega prezidénsia ASEAN nian ba Filipina,” Anwar Ibrahim iha nia diskursu sira iha serimónia enseramentu hosi Simeira ASEAN nian ba da-47.
Nia subliña, korajen idaidak no pasu ki’ik ida-idak bele ajuda rejiaun ne’e atinje nia objetivu sira dame no justisa nian.
Anwar agradese ba belun ASEAN no parseiru diálogu sira hotu ba sira nia kooperasaun no apoiu.
“La ho apoiu, objetivu ida bele artikula ho lian maka’as maibé atinji uitoan de’it,” dehan Anwar.
Nia katak, iha loron dahuluk tinan 2026, ASEAN sei hahú kapítulu foun ida iha lideransa Filipina nian.
“Hanesan onra ida ba ha’u atu entrega lideransa ba Filipina. Ba ha’u nia belun Bongbong, sorte di’ak. Prezidente Marcos Jr,” nia hatete.
Anwar fiar katak iha Marcos nia lideransa, ASEAN sei la’o ba oin ho vizaun no asaun ne’ebé klaru ba beibeik.
Entretantu, Marcos Jr. fó parabéns ba Malázia ne’ebé hetan susesu iha prezidénsia ASEAN iha Anwar Ibrahim nia okos.
Bongbong Marcos hatete katak Filipina sente onradu atu asume prezidénsia ASEAN nian iha 2026.
“Ami prontu atu fasilita Timor-Leste. ASEAN hanesan ami-nia ró no iha tinan 2026, ami sei navega hamutuk, hodi navega ami-nia futuru ne’ebé fahe,” Marcos hatete.
Notísia relevante: Governu no povu selebra adezaun Timor-Leste ba ASEAN
Jornalista : Digna Serrão/Anito Soares
Editór : Florencio Miranda Ximenes
