DILI, 10 Outubru 2025 (TATOLI)—Komisaun Rekrutamentu hahú distribui matéria ezame ba kada pontu fokál Komandu Munisípiu sira iha territoriu nasionál, nune’e iha Domingu (12/09) bele halo teste kulturál ba aplikante ne’ebé konkorre iha vaga membru PNTL foun.
“Ita halo atividade distribuisaun matéria teste ba pontu fokál sira iha munisípiu hodi halo preparasaun ba ezame,” Portavós Komisaun Rekrutamentu membru PNTL foun, Superintende Polísia António da Luz informa ba Jornalista iha Sentru Formasaun Polísia Komoro, Sesta ne’e.
Biban ne’e, nia husu ba konkorrente vaga ne’ebé liu ona faze selesaun dokumentu atu haree idaidak ninia naran iha fatin ezame, ne’ebé komisaun rekrutamentu fó sai ona antes ne’e.
Notísia relevante : Aplikante 12.851 ba vaga membru Polísia liu iha selesaun dokumentu
Komisaun sei taka sai konkorrente sira-nia naran ne’ebé liu, iha fatin ne’ebé antes ne’e define ona.
Superintende Polísia ne’e husu ba kandidatu sira tenke kumpre regra teste nian no molok sai husi uma tenke hatene ona materiál saida mak atu lori.
“Materiál sira ne’ebé uza ba ezame mak hanesan lapis 2B, apagadór, afiadór, regua, buat sira ne’e labele haluha, inklui lori kartaun ne’ebé molok ne’e Komisaun fó ona nomós kandidatu sira labele haluhan kartaun Eleitorál ka Billete Identidade orijinál hodi hatudu ba Komisaun molok tuir teste,” nia fó hanoin.
Aplikante sira tenke iha ona sala ezame molok oras ezame nia hahú, kuandu kandidatu ida mak viola regra ida-ne’e mak sei halo diskualifikasaun.
Antes ne’e mós Komisaun hasai ona oráriu ba teste kulturál, tanba ne’e kandidatu sira tenke kumpre.
Aplikante kualifikadu hahú tuku 07:00-08:00 hotu-hotu tenke iha ona fatin ezame no tuku 10:00 ezame hahú.
“Sira ne’ebé hela dook iha postu administrativu sira karik bele mai besik ona munisípiu iha Sábadu atu nune’e bele partisipa iha ezame no labele tarde. Oráriu ita fó sai ona, tanba ne’e kandidatu sira tenke kumpre oras no tenke disiplina, karik ita-boot sira la disiplina mak ita-boot sira la tama formasaun Polísia,” nia reforsa.
Tuir regra kuandu kandeti ida mak bá tarde ona maka labele ona, tanba buat hotu molok ne’e komisaun fó sai ona.
“Ha’u fiar katak kandidatu sira sei kumpre regra tanba ne’e direitu,” Superintende Polísia tenik.
Komandante Da Luz garante katak prosesu rekrutamentu ba membru PNTL foun 2025 sei la’o iha ámbitu hakmatek no transparante tanba iha mós ekipa reprezentante husi Prezidénsia Repúblika, Parlamentu Nasionál, Ministru Interiór nomós entidade balun hodi monitoriza no superviziona prosesu rekrutamentu.
Jornalista : Natalino Costa
Editora : Julia Chatarina
