DILI, 28 Outubru 2025 (TATOLI)-Ministériu Agrikultura, Pekuária, Peska no Floresta (MAPPF) asina kontratu ho empreza China Civil Engineering Construction Corporation (CCECC), ne’ebé sei konstrui sistema irrigasaun Sahen ho montante orsamentu $7.990.888,13.
Diretór Nasionál Irrigasaun husi MAPPF, Jacinto Filipe Gama, hateten irrigasaun Sahen ne’e bee foti husi mota Soibada, ne’ebé lokaliza entrega postu administrativu Natarbora no Fatuberliu nia klaran hodi fornese bee bá natar munisípiu rua Manatutu, liuliu postu administrativu Natarbora no Manufahi, postu administrativu Fatuberliu.
“Eskema irrigasaun ne’e ita halo estudu iha 2015 no tinan ida-ne’e mak foin asina kontratu ho empreza hodi konstrui. Irrigasaun ne’e sei fó benefísiu ba uma-kain 800-resin no natar ektare 718,8 husi postu administrativu rua ne’e”, Jacinto Filipe Gama hateten iha salaun MAPPF, ohin.
Ministru Agrikultura, Pekuária, Peska no Floresta, Marcos da Cruz, hateten projetu irrigasaun ne’e importante tebes ba dezenvolvimentu setór agrikultura, pekuária no peska iha nasaun ne’e.
“Ohin ita asina ona kontratu ho empreza CCECC, sira mak sei sai na’in ba projetu ne’e. Tuir kontratu iha durasaun tinan rua ka fulan 24”, informa.
Nia esplika, tuir lei, hafoin asina kontratu sei haruka ba Tribunál Konta atu fiskaliza no bainhira buat hotu la’o loos ona mak sei asina ho konsultór hodi hahú serbisu.
“Ita hatene munisípiu rua ne’e poténsia ba natar, maibé bee mak sai problema. Entaun, daudaun Governu hahú esforsu hadi’a no kontribui irrigasaun sira ba oin hodi ajuda komunidade hasa’e produsaun hare no seluk tan iha rai-laran”, afirma.
Iha biban ne’e, nia parte husu ba empreza manán-na’in CCECC atu ba oin ezekuta projetu ne’e ho di’ak. Governu fó fiar ba atu ezekuta projetu referidu, tanba antes ne’e halo ona konstrusaun ba irrigasaun Galata ne’ebé finaliza ona no hein inaugura iha Novembru.
“Ha’u husu empreza ezekuta projetu ida-ne’e ho di’ak, garante nia kualidade tuir kontratu ne’ebé iha”, nia apela.
Iha fatin hanesan, Diretór Ezekutivu CCECC, Lile, agradese ba Governu tanba fó fiar hodi konstrui irrigasaun Sahen, tanba antes ne’e konstrui ona irrigasaun Galata ne’ebé finaliza ona no hein entrega ba Governu.
“Oportunidade ida-ne’e ami kompromete halo serbisu tuir kontratu ne’ebé iha no garante nia kualidade”, nia asegura.
Notísia relevante: MAPPF no empreza Minarta asina akordu hodi konstrui irrigasaun Maukola-Kovalima
Jornalista: Arminda Fonseca
Editora: Maria Auxiliadora
