DILI, 28 Outubru 2025 (TATOLI)–Ekipa Selesaun Nasionál futeból Timor-Leste hahú prepara aan liuhosi treinu antes partisipa jogu kontinuasaun faze kualifikasaun Grupu A hasoru Tazaskistaun iha fulan-Novembru tinan ne’e.
Selesaun nasionál halo preparasaun hafoin durante semana-rua deskansa depoizde derrota ho Filipina iha loron 14 Outubru liubá iha-ne’ebé rezulta ekipa Lafaek lakon oportunidade atu hakat bá faze finál Tasa AFC Asian Cup 2027 ne’ebé sei realiza iha Arábia Saudita.
Mezmu nune’e, Treinadór Prinsipál Selesaun Nasionál, Zé Pedro kontinua treina jogadór sira iha Kampu Demokrasia hodi prepara antes hala’o jogu kontinuasaun volta dalimak kontra Tazaskistaun ne’ebé tuir kalendáriu sei hala’o iha Darwin-Austrália, 18 Novembru.
Notísia relevante: Selesaun Nasionál TL iha odamatan eliminasaun husi faze kualifikasaun AFC Futsál Asian Cup
“Jogu entre Timor-Leste ho Tazaskistaun agora, Timor-Leste mak sei sai hanesan uma-na’in iha Darwin, Austrália,” komunikadu imprensa ne’ebé TATOLI asesu dehan iha Tersa ne’e.
Timor-Leste iha misaun kombate bainhira hasoru Tazaskistaun iha-ne’ebé rezultadu iha jogu volta dahuluk derrota ho skor mihis 1-0 ne’ebé hala’o iha Estádiu Sentrál Repúblika Tazaskistaun, 25 Marsu tinan ne’e.
Entretantu, tuir tabela klasifikasaun, Grup A lidera husi Filipina ho pontu sanulu (10), rezultadu husi manán tolu (3), impata ida (1), Tazaskistaun okupa iha pozisaun daruak ho pontu sanulu (10).
Enkuantu, Timor-Leste okupa iha pozisaun datoluk ho pontu tolu (3), rezultadu manán ida (1), derrota tolu (3) no Maldiva iha pozisaun ikus ho pontu 0 hafoin derrota jogu haat (4).
Jornalista: Natalino Belo
Editór: Xisto Freitas da Piedade
