Agrikultura Oekusi inaugura projetu bee-moos fasilita grupu ortikultura 34 iha Usitasa’e
OEKUSI, 29 Outubru 2025 (TATOLI) – Diresaun Rejionál Agrikultura Rejiaun Administrativa Espesiál Oekusi Ambeno (RAEOA), kuarta ne’e, inaugura projetu perfurasaun sistema bee-moos atu fasilita grupu ortikultura 34 iha área Noepapa aldeia Buqui suku Usitasa’e sub-rejiaun Oésilo.
Notísia relevante:Agrikultura Oekusi implementa projetu perfurasaun bee-moos iha Usitasa’e no Taiboko
Diretór Diresaun Rejionál Agrikultura, José Oqui, hateten, projetu ne’e importante atu fasilita grupu ortikultura sira, hodi utiliza ba kuda modo no produtu seluktan, tanba antes ne’e propoin mai husi grupu sira liuhusi autoridade suku.
“Ohin ita sai sasin, kompañia entrega ona autoridade, depois ami sei entrega ona inan-aman sira-ne’ebé estabelese grupu atu bele utiliza ona, maibé mak ne’e, obra ne’e ita halo ho osan Estadu, ne’ebé presiza ita hotu nia responsabilidade tau matan ba, tanba Governu halo fasilidade ne’e ba ita hotu atu ajuda ita-nia atividade sira – labele estraga, se bele delega kompeténsia ba ema ruma, atu fó seguransa no mós halo lutu hale’u, atu animál sira labele mai besik hodi estraga,” nia hateten, iha ámbitu inaugurasaun ne’e.
Xefe aldeia Buqui, Simão Quelo, nu’udar mós membru grupu ortikultura, akresenta, inisiativa ne’e sira rekomenda ba autoridade RAEOA iha tinan kotuk, tanba iha ne’e rai kapas tanba tetuk, depois inan-aman sira mós iha inisiativa kuda modo no ai-fuan seluktan.
“Maibé, ami araska ba bee-moos, tanba ami-nia grupu ne’e envolve ema na’in-34 maibé durante ne’e ami la’o do’ok kuaze kilometru ida ba kuru iha mota, maibé ohin ami agradese tanba ami-nia preokupasaun ne’e, konsege responde ona. Entaun, rekomendasaun ne’ebé ohin parte agrikultura hato’o ami konsidera importante tenke tau matan, tanba ami mak utilizadór,” nia kompromete.
Notísia relevante:Agrikultura Oekusi apoia fasilidade kolleta ikan ba grupu peskadór Nípani
Entretantu, projetu perfurasaun bee-moos ne’e, implementa husi empreza Abi Haemjam ho valór orsamentu rihun $28,570.00 ho durasaun serbisu fulan haat, kompleta kedas ho tanke bee-moos ho nia medida 2×2.
Jornalista: Abílio Elo Nini
Editór: Rafael Ximenes de A. Belo
