DILI, 29 Outubru 2025 (TATOLI)—Koordenadór Gabinete Kurríkulu Unidade Nasionál Ministériu Edukasaun (ME), João Maupelu hateten estudante finalista hamutuk 225 mak auzente iha ezame nasionál ne’ebé realiza ona iha 20 Outubru no ramata iha 27 Outubru 2025.
“Estudante hamutuk 225 mak auzente ka la tuir ezame nasionál. Ita seidauk hatene razaun estudante sira-ne’e la tuir ezama nasionál. Maibé, ita nafatin prepara pontu ezame nasionál ba segunda faze nian,” João Maupelu ba TATOLI iha resintu Institutu Nasionál Formasaun Dosente no Profisionál Edukasaun (INFORDEPE), Balide, Kuarta ne’e.
Maupelu dehan, ezame nasionál ba segunda faze ne’e akontese depoiz loron 15, ne’ebé sei sura hahú hosi 28 Outubru 2025. Pontu ezame nasionál ne’e sei lahanesan ho ezame ne’ebé liu tiha ona ba ne’e.
Notísia relevante: Ezame Nasionál nu’udár dezempeñu akadémiku hodi reafirma prinsípiu pedagójiku fundamentál
Koordenadór kurríkulu hatutan agora ne’e ekipa kurríkulu hahú ona halo korresaun ba pontu ezame nasionál.
“Ekipa kurríkulu halo korresaun durante loron 20 nia laran ba pontu ezame nasionál, ne’ebé ita hahú ona iha 27 Outubru no sei ramata iha 20 Novembru 2025. Korresaun ne’e la’ós ho manuál maibé ho mákina ne’ebé mak nia rezultadu sai mai dala ida ho nia valór estudante nian,” nia tenik.
João Maupelu informa hosi valór ezame nasionál ne’e depoiz sei ajusta ho valór períodu dahuluk no daruak nian.
Iha fatin hanesan, Diretór Servisu Edukasaun Munisípiu Manatutu, Patrício da Cruz Quintão, informa lista estudante ne’ebé tuir ezame nasionál hamutuk 1.915, kompostu husi ensinu báziku 967, ensinu sekundáriu jerál 872 no ensinu sekundáriu tékniku vokasionál hamutuk 66.
Hosi totál referidu estudante ne’ebé tuir ezame nasionál hamutuk 1.875 kompostu husi ensinu báziku 933, ensinu sekundáriu jerál 876 no ensinu sekundáriu tékniku vokasionál 66.
“Agora estudante ne’ebé auzente iha ezame nasionál hamutuk 40 kompostu husi ensinu báziku iha na’in-34, ensinu sekundáriu jerál na’in-rua (2) no ensinu sekundáriu tékniku vokasionál hamutuk na’in-haat (4),” nia dehan.
Nia hatutan estudante auzente ne’e parte Edukasaun Manatutu submete ona mai nasionál no hein prosesu ba ezame tuirmai nian.
Entretantu, Diretór Servisu Edukasaun Munisípiu Likisá, Júlio da Silva informa estudante 1.996 mak tuir ezame nasionál no hosi númeru na’in-rua mak la tuir ezame.
“Estudante na’in-rua ne’e ita submete ona mai nasionál hodi prosesu ba ezame segunda faze nian,” nia hateten.
Jornalista: Osória Marques
Editór: Xisto Freitas da Piedade
