Kandidatu PNTL sira sei hakat ba teste fíziku no entrevista iha 06 Novembru
DILI, 29 Outubru 2025 (TATOLI) – Polísia Nasionál Timor-Leste (PNTL), liuhusi Sekretariadu Rekrutamentu fó sai ba públiku katak kandidatu ne’ebé tuir ona prova kulturál hamutuk 12.996 mak hakat bá prova aptidaun fízika, entrevista no psikolojia, ne’ebé sei hahú iha loron 06 Novembru.
Superintendente no Portavós Komisaun Rekrutamentu PNTL, António da Luz, informa katak kandidatu 13.106 mak foin lalais submete dokumentu, maibé husi númeru ne’e ema na’in-340 mak la partisipa iha prova kulturál.
“Tanba ne’e, husu ba kandidatu sira ne’ebé partisipa ona prova kulturál nian atu mai tuir prova aptidaun fízika, entrevista profisionál no prova psikolojia hahú husi 06 Novembru 2025. Teste ne’e sei hala’o iha Sentru Formasaun Polísia Komoro, ne’ebé sei partisipa husi kada munisípiu tuir oráriu ne’ebé iha”, António da Luz informa ohin.
Nia esplika katak oráriu ba prova sira ne’e ba kada munisípiu la hanesan. Ba Aileu no Ataúru sei realiza iha loron 06 to’o 08 Novembru 2025. Ainaru iha loron 10, 11 no 13 Novembru. Baukau iha 13-14 Novembru no kontinua fali iha 17, Bobonaru iha loron 18-20, Kovalima entre 21 no 22 Novembru. Ba munisípiu Dili sei hala’o iha loron 24-29 Novembru no kontinua iha 01 to’o 06 Dezembru no 08 to’o 09.
Ba Ermera sei tuir testu iha 10-12 Dezembru, Lautein iha loron 13 no 15, Likisá 16-18, Manatutu 19-20 Dezembru, Manufahi 22-23, Oekusi 26-27 no ba Vikeke iha 29-30 Dezembru.
Tuir nia, kandidatu sira tuir prova ne’e sei fahe ba kada loron ema na’in-300, iha ne’ebé na’in-150 sei partisipa ida dadeer, pur volta tuku 7h30 to’o 12h30, no 150 ba parte loraik, iha tuku 13h30 to’o 17h30.
Dokumentu no materiál ne’ebé kandidatu sira presiZa lori mak kartaun eleitorál orijinál ka billete identidade (BI), resibu prova kulturál nian, kandidatu idaidak sei lori rasik ninia hahán ka bee hemu durante teste.
Nia salienta katak ba prova aptidaun fízika husu ba kandidatu sira atu lori sapatu kets (olah raga), kalsa badak ou training, kamizola ka kaos, ba intervista profisional no teste psikolojia kandidatu sira tenke uza sapatu, kalsa naruk, faru liman badak ka naruk moos no kaber.
Durante teste la’o bandu kandidatu sira hasai foto no sei la autoriza inan-aman ka família atu akompaña sira tama iha fatin prova nian.
“Oráriu ba teste nian bele iha mudansa kada tempu, tanba ne’e husu ba kandidatu sira atu nafatin komunika ho Sekretariadu Rekrutamentu hodi bele hetan konfirmasaun”, nia sujere.
“Ita husu ba kandidatu sira bele bá hare oráriu teste nian ne’ebé taka iha Komandu munisípiu idaidak nian. Husi kandidatu sira ne’ebé iha valór, rezultadu sei fó sai bainhira teste hotu parte haat ne’e mak fó sai dalaida, valór akumulativu hetan 400 mak hakat ba teste médiku nian”, konklui.
Notísia relevante: Komisaun Rekrutamentu no ME halo abertura korresaun prova kulturál ba membru PNTL
Jornalista: Arminda Fonseca
Editora: Maria Auxiliadora
