OEKUSI, 29 Outubru 2025 (TATOLI) – Ministru Administrasaun Estatál (MAE), Tomas do Rosário Cabral, tersa ne’e, observa direita projetu adisionál rua, ne’ebé ezekuta husi Programa Nasionál Dezenvolvimentu Suku (PNDS) iha suku foun Monemeko sub-rejiaun Pante Makasar Rejiaun Administrativa Espesiál Oekusi Ambeno (RAEOA).
Notísia relevante:PNDS Oekusi aprova projetu rua hodi implementa iha suku Monemeko no Kutete
Iha vizita ofisiál ne’e, Governante ne’e rekomenda ba parte tékniku PNDS Oekusi katak, tenke finaliza iha Fevereiru 2026, tanba projetu PNDS regulár hamutuk 22 sei finaliza iha Novembru 2025 ne’e.
“Sua exelénsia mai haree projetu adisionál rua PNDS iha tinan ne’e, tanba projetu rua ne’e nia orsamentu transfere direita mai husi Ministériu la integra iha planu prioridade PNDS Oekusi nian, tanba suku foun Monemeko foin eleitu iha tinan ne’e, entaun Ministériu mak finánsia direita. Ida-ne’e mak horsehik Sua exelénsia mak ko’alia mai ami iha ámbitu vizita ne’e,” informa Diretór PNDS Oekusi, João Bobo.
Projetu rua ne’ebé finánsia direita hosi MAE mak projetu harii kapela no morru protesaun hale’u estatua Nossa Senhora Peregrina Leolbatan nian.
Nia informa, iha ámbitu ne’e, Ministru Administrasaun Estatál rekomenda ba ekipa tékniku atu aselera mós projetu PNDS regulár sira hamutuk 22, tanba antes ne’e hatuun ona despaixu katak 31 Outubru tenke konklui, maibé iha sorumutu horsehik ne’e, Ministru fó tan tempu hodi extende to’o Novembru.
“Ba projetu adisionál rua ne’e, ita haree nia progresu foin hahú, sei la konsege finaliza iha tinan ne’e, maibé rekomenda mai ami, atu finaliza iha Fevereiru 2026 nian tenke entrega ona. Kona-ba PNDS regulár nian, horsehik ami simu ona orientasaun katak, estende to’o Novembru 2025 projetu hot-hotu iha Oekusi tenke ramata ona, tan ne’e mak PNDS sei esforsa hamutuk ho Ekipa Jestaun Suku, atu aselera,” nia afirma.
Iha biban ne’e, Xefe Suku Monemeko José Sani, agradese tanba suku foun Monemeko, foin eleitu iha tinan ne’e, MAE konsege tau prioridade atu hadi’a fatin relijioza sira.
“Ami agradese ba Governu liuliu MAE, tanba ami-nia proposta submete ba nasionál hanesan suku foun ida, Governu la taka matan hodi apoia ami-nia suku liu-liu hadi’a ami-nia kapela no halo morru ba estatua Nossa Senhora, tanba fatin ne’e nu’udar fatin turizmu relijioza ida iha Oekusi, kada loron hetan vizita husi sarani sira, entaun ami espera ba futuru bele kontinua tau matan mós ba ami-nia estrada no bee-moos nian,” nia orgullu.
Notísia relevante:31 outubru, projetu PNDS regulár iha RAEOA tenke konkluídu
Entretantu, projetu harii kapela ne’e ho valór orsamentu rihun $62-resin no projetu morru hale’u estatu Nossa Senhora rihun $33-resin.
Jornalista: Abílio Elo Nini
Editór: Rafael Ximenes de A. Belo
