DILI, 30 Outubru 2025 (TATOLI)-Ministériu Finansa (MF) liuhusi Diresaun-Jerál Patrimóniu Estadu arrekada, dezde Fevereiru tinan ne’e, reseita hamutuk millaun $1,96 ba kofre Estadu, liuhusi leilaun veíkulu no sasán Estadu.
Diretora-Jerál Patrimóniu Estadu, Timótia Marques, hateten reseita ne’e mai leilaun ne;ebé loke iha faze dahuluk no daudaun ne’e simu ona proposta husi instituisaun Estadu no liña ministeriál hamutuk 38 ne’ebé submete sira-nia ekipamentu hanesan sasán, motorizada, karreta atu halo leilaun.
Nia dehan provizóriu ne’e identifika ona karreta 400-resin, motorizada rihun 2, ekipamentu sira seluk hamutuk item 28.
“Ministériu Finansa, liuhusi Diresaun Patrimóniu Estadu halo hela verifikasaun no inspesaun, nune’e semana oin sei realiza enkontru atu deside modalidade leilaun ba faze daruak”, nia informa ba Tatoli iha edifísiu Komisaun Funsaun Públika (KFP), Matadouru, ohin.
Nia relata katak, dezde tinan 2011, implementasaun leilaun ne’e rekolla ona reseita hamutuk millaun $9.
Diretora Jerál ne’e informa tinan oin sei fó prioridade inventariza patrimóniu Estadu tomak ba beins no móveis ho objetivu mak atu kontrola ho di’ak liután.
Jornalista: Nelson de Sousa
Editora: Maria Auxiliadora
