DILI, 30 Outubru 2025 (TATOLI)-Diresaun Nasionál Transporte Terrestre (DNTT) fó sai ona sirkular no husu ba motorista mikrolete ka transporte públiku urbanu iha Dili katak atu tula no hatún pasajeiru sira iha pontu parajen ka halte bus ne’ebé Governu konstrui ona.
“Ita fó sai ona sirkulár, husu ba públiku, liuliu komunidade ne’ebé hakarak uza transporte públiku tenke hein iha pontu parajen públika ne’ebé iha, inklui mós ba motorista sira tula pasajeiru tenke hatún iha paranjen sira ne’ebé konstrui ona”, Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, informa ba Tatoli, ohin.
Nia esplika katak objetivu tenke tula no hatún pasajeiru iha paranjen públika ida-ne’e, tanba empreza finaliza ona konsturusaun parajen públika, entaun oinsá eduka motorista sira no komunidade hodi respeita sinál tránzitu sira ne’ebé iha no hatene funsaun parajen públika ne’e, hodi evita engarrafamentu.
“Agora ita sei orienta sira kumpre lai sirkulár ne’ebé iha depois mak ita sei avalia, sira kumpre ka la’e mak hanoin fali multa sira ne’e, tanba ita halo ona sosializasaun ba sira liuhusi mídia sira”, dehan.
Lembra katak, iha 2024, MTK kontrata empreza Carisma ho montante $96.956 hodi konstrui parajen públika hamutuk 10.
Fatin harii parajen ne’e iha estrada protokolu sira hanesan iha Komoro, Timor Plaza, Ai-Mutin, Bairru Pité, Vila Verde, edifísiu Ministériu Solidaridade Sosiál no Inkluzaun (MSSI) nia oin, Matadouru iha eskola UNAMET nia oin, Vila Verde iha igreja Katedrál nia sorin, Kaikoli iha Kuartél Jerál PNTL nia oin iha Diresaun Nasionál Transporte Terrestre (DNTT) Balide nian.
Maibé, iha parte Timor Plaza nia oin ekipa Sekretaria Estadu Asuntu Toponímia no Organizasaun Urbana (SEATOU) sobu tiha no daudaun parte MTK no Ministériu Administrasaun Estatál sei koordena hodi buka solusaun.
Notísia relevante: DNTT hahú estabelese ona parajen públiku balun iha Dili
Jornalista: Arminda Fonseca
Editora: Maria Auxiliadora
