JMT identifika merkadu balun kondisaun aat iha Vikeke
VIKEKE, 30 Outubru 2025 (TATOLI)—Diretora Jestaun Merkadu no Turizmu (JMT) Munisípiu Vikeke, Mirandolina Fátima da Costa Guterres informa JMT identifika merkadu ne’ebé eziste iha postu administrativu lima mak kondisaun aat.
“Ami halo identifikasaun ba merkadu sira-ne’ebé lokaliza iha postu administrativu lima hanesan Lakluta, Ossú, Vikeke Vila, Uatulari no Uatukarbau, maibé merkadu balun kondisaun aat mak ita-nia vendedór sira uza fa’an produtu lokál,” Mirandolina ba TATOLI iha Postu Vikeke Vila, Kinta ne’e.
Nia haktuir Postu Lakluta merkadu ida-ne’ebé ekipa JMT observa kondisaun atuál sei di’ak, Postu Ossú merkadu rua ho kondisaun di’ak.
“Iha Postu Uatulari merkadu hamutuk lima. Ekipa haree merkadu ida mak kondisaun di’ak. Enkuantu, merkadu haat mak kondisaun aat. Ne’e ita tau ona planu ba Programa Dezenvolvimentu Integradu Munisipál (PDIM) tinan 2026 hodi halo reabilitasaun,” nia aprezenta.
Entretantu, iha Postu Uatukarbau, merkadu hamutuk rua maibé kondisaun aat grave hotu.
“Iha postu Vikeke Vila ita rejista merkadu hamutuk lima. Merkadu rua mak kondisaun di’ak, más merkadu tolu mak kondisaun ladi’ak,” Mirandolina informa.
Iha fatin ketak, negosiante Uatukarbau, Francisco da Costa husu autoridade hodi tau-matan ba kondisaun merkadu Uatukarbau ne’ebé daudaun ne’e ho kondisaun fízika grave.
“Ita haree uma merkadu ne’e kondisaun grave tebes. Tempu udan no anin boot negosiante sira tenke hapara atividade negósiu, tanba uma ninia kondisaun aat,” nia haktuir.
Merkadu Uatukarbau konstruidu dezde okupasaun Indonézia iha tinan 1983, nune’e uma nia ai-riin aat, kalen balun monu hotu ona.
Merkadu referidu negosiante sira sira husi Postu lliomar (Lautein) no Uatulari mai fa’an hotu produtu iha-ne’ebá.
Jornalista: Vitorino Lopes da Costa
Editór: Xisto Freista da Piedade
