DILI, 30 Outubru 2025 (TATOLI)–Membru Unidade Patrullamentu Fronteira (UPF) ho naran Benjamin dos Santos, tiru-an ho Pistola iha haris-fatin Postu iha Ponte Nunura, Suku Leo-Lima, Postu Administrativu Balibo, Munisípiu Bobonaru, iha tuku 15:00, Kuarta (29/10).
Komandante Jerál PNTL Komisáriu Jerál Polísia Henrique da Costa hateten, parte Komandu orienta kedan halo investigasaun hafoin akontesimentu.
Nune’e, kriminál nasionál no forénsiku bá kedan iha fatin hodi halo serbisu investigasaun ninian.
“Komandu seidauk hatene loloos motivu husi membru PNTL uza pistola tiru-an tanba ita-nia parte investigsaun sei halo hela serbisu. Mas iha buat balun ne’ebé mak dala ruma ligadu ho presaun serbisu mós,” Henrique hateten ba Jornalista sira iha Unidade Espesiál Polísia (UEP), Bairru-Pité, Kinta ne’e.
Notísia relevante : UPF asegura joven 16 ne’ebé tenta ultrapasa fronteira terrestre
Nia dehan, dala ruma kazu sira hanesan akontese tanba kolokasaun membru limitadu, entaun iha postu ida ema na’in-rua ka tolu.
“Ida-ne’e mós bele sai impaktu ida tanba ema kuandu serbisu iha presaun, ho serbisu ida ne’ebé mak maka’as nia bele foti desizaun mós halo hanesan ne’e,” nia akresenta.
Komisáriu Jerál Polísia nota, kondisaun ne’e bele iha ligasaun ho psikolojia ka tanba serbisu iha prrsaun nia laran.
“Ema ida de’it nia halo serbisu oras 24 kontrola distánsia ne’ebé dook, ida-ne’e mós sai hanesan ponténsia ida hotu,” nia katak.
Henrique haktuir, antes ne’e membru ne’e nia kondisaun normál.
“Maibé ita-nia parte investigsaun nomós Servisu Investigsaun sei hala’o sira-nia serbisu depois sira sei relata mai iha komandu,” nia tenik.
Jornalista : Natalino Costa
Editora : Julia Chatarina
