ME planeia xamada bolsa kandidatu ensinu sekundáriu hamutuk 700 iha Novembru
DILI, 30 Outubru 2025 (TATOLI)—Sekretáriu Estadu Ensinu Sekundáriu Jerál no Eninsu Sekundáriu Tékniku Vokasionál, Domingos Lopes Lemos hateten Ministériu Edukasaun (ME) planeia atu xamada bolsa kandidatu ba ensinu sekundáriu hamutuk 700 iha fulan-Novembru tinan ne’e.
“Asinatura no termu aseitasaun ba profesór ne’ebé identifikadu no análize tuir kuadru pesoál ba ensinu sekundáriu nian hamutuk 700 hein xamada iha 03-07 Novembru 2025,” Domingos Lemos hateten liuhosi nota komunikadu ne’ebé TATOLI asesu, Kinta ne’e.
Govenante ne’e hatutan análize ne’ebé kuadru pesoál Ministériu Edukasaun halo iha 20-24 Outubru 2025, agora preparadu ona. Agora hein fali despaxu ministeriál nian, xamada no publika avizu sira iha 27-30 Outubru 2025.
“Nune’e, formasaun preparatória ne’ebé Institutu Nasionál Formasaun Dosente no Profisionál Edukasaun (INFORDEPE) ba profesór 300 no restu hosi ne’e ita sei koloka maibé ba formasaun ne’e ba tinan oin. Agora iha faze dahuluk ne’e ita sei koloka 700 ne’ebé formasaun ba profesór iha faze dahuluk sei akontese iha Novembru tinan ne’e,” nia akresenta.
Notísia relevante: ME fasilita formasaun indusaun ba bolsa kandidatu 187
Biban ne’e, Sekretáriu Estadu apela ba profesór ne’ebé pasa ona iha bolsu kandidatu ensinu sekundáriu nian sei kontaktu diretamente hosi Diresaun Rekursu Umanu hodi kompleta dokumentu iha Ministériu Edukasaun.
Totál profesór ne’ebé pasa iha teste hamutuk 1.095 hosi totál ema 8.779 neʼebé konkorre ba vaga ensinu sekundáriu ne’e. Enkuantu, vaga ne’ebé ME planeia no alvu ne’ebé presiza hamutuk 1.450. Sei falta 355.
Dixiplina portugés no tema husi literatura no kultura presiza vaga 250 maibé iha de’it 114, entaun sei presiza tan ema 136. Tétun vaga 125 maibé iha de’it 21 entaun presiza 104. Inglés vaga 125, maibé pasa iha de’it 40 no sei presiza tan 85. Maláiu vaga 75, pasa de’it mak na’in-hitu no sei falta ema 68. Istória, jeografia no sidadania vaga iha 150, pasa hamutuk 73 no falta ema 77.
Ekonómia no métodu kuantitativu vaga iha 100 maibé ema pasa liu alvu. Disiplina vaga iha 100 maibé pasa ne’e iha de’it 20 no sei falta 80. Fízika no kímika vaga 125, pasa 41 no falta tan 84. Biolojia no jeolojia vaga 100, pasa hamutuk 160, entaun ida-ne’e mós liu tiha alvu ministériu nian.
Teknolojia, multimídia no informátika vaga iha 125 no ema pasa 158. Edukasaun fízika no desportu vaga iha 100 maibé pasa naʼin-tolu no sei falta 93. Relijiaun no morál iha vaga 100 maibé pasa 137.
Jornalista: Osória Marques
Editór: Xisto Freitas da Piedade
