BOBONARU, 04 Novembru 2025 (TATOLI) – Autoridade Munisípiu Bobonaru, liuhusi Sekretariadu Apoia Finana aloka rihun $40 hodi komemora Loron Proklamasaun Independénsia Timor-Leste ba da-50 (1975-2025).
Serimónia iha munisípiu ne’e sei realiza iha kampu Futeból Maliana, no mós iha postu administrativu lima seluk.
Orsamentu ne’ebé autoridade hotu ba postu administrativu Maliana, Balibó, Atabae, Kailaku, no Lolotoe ho totál kada postu $1.500 no Bobonaru mak $1.800.
Prezidente Komisaun Organizadora, atuál Sekretáriu Autoridade Bobonaru ba Asuntu Planeamentu no Dezenvolvimentu Integradu, Semedo Laco, hateten orsamentu ne’e atu finansia ba preparasaun ba parada, animasaun, desportu komunitáriu, mobilizasaun komunidade husi suku, inklui aprezentasaun produtu lokál no dansa ho tebe kultura munisípiu Bobonaru nian no feira nasionál ne’ebé sei hala’o iha Dili.
“Atividade sira ne’e ita realiza atu anima komunidade hodi komemora loron istoriku ne’e”, Semedo Laco hateten iha ámbitu enkontru establesimentu Komisaun Organizadora ba komemorasaun 28 Novembru, iha salaun Maria Tapó, ohin.
Prezidente Autoridade Munisípiu Bobonaru, Paulo Moniz Maia, orienta komisaun organizadora atu halo preparasaun hahú iha loron 15 to’o 27 Novembru hodi fó susesu ba komemorasaun loron nasionál ne’e.
“Ida-ne’e orientasaun husi nasionál, ne’ebé ita-nia komemorasaun 28 Novembru tinan ne’e mós dalaruma úniku uitoan, tanba ita mós adere ona ba ASEAN no buat barak liután atu halo. Ita hakarak 28 Novembru ne’e tenke la’o di’ak, atividade ne’ebé ita atu halo ho responsablidade atu ita-nia povu bele partisipa hotu”, katak.
Proklamasaun Independénsia 28 Novembru 1975 hanesan deklarasaun independénsia unilaterál Repúblika Demokrátika Timor-Leste nian husi Fretilin, ho Francisco Xavier do Amaral nu’udar prezidente dahuluk.
Proklamasaun ida-ne’e halo bainhira Portugál sei iha hela prosesu dekolonizasaun, maibe liu tiha loron balun, Indonézia invade territóriu ne’e no nakfilak ba Indonézia nia provínsia ba da-27, ho naran “Timor-Timur”.
Notísia relevante: Gregório Saldanha: 28 Novembru nu’udar loron embriaun ba luta ukun rasik aan
Jornalista: Sergio da Cruz
Editora: Maria Auxiliadora
