DILI, 04 Novembru 2025 (TATOLI) – Governu atribui podér ba Ministra Edukasaun (ME), Dulce de Jesus Soares, atu asina memorandu entendimentu (MoU, iha inglés) ida ho Governu Singapura ba kooperasaun iha ámbitu edukasaun, liuliu iha formasaun ba profesór sira.
Dulce de Jesus esplika katak diskusaun ne’e hala’o kedas iha Marsu 2025, atu asina nota entendimentu ho Institutu Nasionál ba Edukasaun husi Singapura.
“Institutu ida-ne’e sai kategoria 10 iha mundu, entaun atu serbisu hamutuk ho Institutu Nasionál Formasaun Dosente no Profisionál Edukasaun [INFORDEPE] atu reforsa ita-nia formasaun ba profesór sira, formadór, funsionáriu Ministériu Edukasau,n nomós ba líder eskola sira”, Dulce de Jesus Soares hateten iha Palásiu Governu, ohin.
Nia salienta katak akordu ne’e hanesan akordu sombriña ida, ba oin INFORDEPE sei iha kooperasaun direta ho sira tanba sira mós mai ona iha ne’e, halo estudu badak ida kona-ba INFORDEPE nian no vizita bá eskola sira.
Jornalista: Arminda Fonseca
Editora: Maria Auxiliadora
