DILI, 04 Novembru 2025 (TATOLI)–Vise-Ministra Asuntu ASEAN, Milena Rangel, hateten adezaun Timor-Leste ba ASEAN finaliza ona no Timor-Leste hanesan ona membru plenu, maibé kompromisu ba oin importante tebes atu servisu maka’as husi parte hotu.
Notísia Relevante: Xanana: Tama ASEAN sai oportunidade no responsabilidade boot ba Timor-Leste
“Ita tama ona ba ASEAN, agora ita-nia kompromosiu ba oin ne’e mak importante tebes. Dezafiu boot ba ita iha kompromisiu sira, entaun husu parte hotu atu servisu hamutuk no hetan apoiu mós husi nasaun membru sira no Sekretariadu ASEAN,” Milena hateten ba jornalista sira iha Hotel Timor, tersa ne’e.
Daudaun ne’e, Timor-Leste iha ona ezbosu ida-ne’ebé bolu naran Estretéjia ba implementasaun ASEAN ekonomia pilar nian ho planu ida kobre ba 2026-2030, nune’e tenke haree atu alina ba nesesidade rejiaun nian.
Tanba ne’e, Governante ne’e husu ba timoroan hotu atu kria pás no estabilidade hodi servisu hamutuk ba oin hodi atinje Timor-Leste nia objetivu iha adezaun ida-ne’e liuliu hasa’e ekonomia rai-laran.
Antes ne’e, iha loron 26 fulan-Outubru Timor-Leste ofisialmente sai ona ba membru plenu ASEAN no hetan aseitasaun hotu husi nasaun membru sira bainhira simeira ASEAN ba dala 47 ne’ebé realiza iha Kual Lumpur Malázia.
Notísia Relevante: Ofisialmente Timor-Leste sai membru ASEAN, PM Xanana : “Ami prontu servisu hamutuk”
Jornalista : Hortencio Sanchez
Editór : Cancio Ximenes
