DILI, 05 Novembru 2025 (TATOLI)—Koléjiu Comopolitan of Commerce & Technology (COSMO) husi Brunei Darussalam apoia Institute of Business (IOB) hodi loke formasaun profisionál ba joven sira iha área oioin hahú ho formasaun ba lian inglés.
“Ami sente onradu tebes, ohin, hasoru malu ho Prezidente Repúblika José Ramos-Horta. Ami mai husi Brunei Darussalam, husi instituisaun akadémika COSMO, ami-nia intensaun atu kolabora ho IOB hodi fó formasaun profisionál iha área espesializada sira. Tanba ne’e, ohin, ami mai hasoru malu ho Prezidente Repúblika hodi informa kona-ba ami-nia kooperasaun ho IOB,” Diretor Ezekutivu COSMO husi Brunei Darussalam, Prabhu Sethuratnam, hateten ba jornalista sira hafoin termina reuniaun ho Xefe Estadu, iha Palásiu Prezidensiál Nicolau Lobato, Bairru Pite, kuarta ne’e.
Nia dehan, ho inisiativa ne’ebé COSMO halo ho IOB, Prezidente Repúblika fó apoiu másimu tanba kooperasaun ne’e di’ak hodi kapasita rekursu umanu iha Timor-Leste.
Nia informa, kooperasaun ne’e nia implementasaun sei hahú iha fulan-Janeiru tinan 2026 no sei hahú uluk ho formasaun ba lian inglés ho padraun internasionál.
“Ami sente motivadu tebes, hafoin ko’alia ho Prezidente Repúblika, ami fiar katak iha oportunidade barak ami bele kontribui ba jerasaun foun, ba joven sira liuliu iha formasaun profisionál. Ho formasaun profisionál bazeia ba karáter, ami mós bele fornese formasaun ho kualidade iha ASEAN, Austrália, no Nova Zelándia,” nia hateten.
Iha sorin seluk, Reitór Institute of Business (IOB), Pedro Ximenes, esplika kolaborasaun ne’e hahú hafoin Ministériu Negósiu Estranjeiru no Kooperasaun (MNEK) liuhusi Embaixadór Timor-Leste iha Brunei Darusalam halo kooperasaun di’ak hp parte COSMO.
“Formasaun iha lian inglés bele, ekipa ami-nia jerasaun joven sira, karik sira hakarak servisu iha estranjeiru, sira-nia abilidade iha lian inglés sei hadi’a. Hodi permiti sira, asegura servisu sira ne’ebé di’ak-liu,” Reitór ne’e hateten.
Nia hatutan, formasaun profisionál sei hahú ho kursu lian inglés ho sertifikadu iha nível ASEAN no Nova Zelándia.
“Ami sei loke uluk iha Dili, maibé ami mós sei habelar ba munisípiu sira seluk. IOB lokaliza iha Maliana no Baukau, nune’e ami mós sei vizita hela Munisípiu sira seluk,” nia dehan.
Nia informa, durante enkontru ho Xefe Estadu ne’e, PR Ramos-Horta propoin mós ba IOB atu loke mós formasaun ba ospitalidade no formasaun seluk ne’ebé bele kria empregu ba joven sira no buka meiu oinsá atu bele habelar emprendedorizmu atu haburas inisiativa emprezeriál liuliu ba jerasaun foun sira.
Jornalista : Hortencio Sanchez
Editór : Cancio Ximenes
