DILI, 05 Novembru 2025 (TATOLI)–Jogadór prinsipál na’in-rua husi selesaun nasionál Timor-Leste hanesan kapitaun ekipa Gali Freitas no Mouzinho de Lima sei auzénsia bainhira Timor-Leste kontra Tazaskistaun iha jogu kontinuasaun Grupu A faze kualifikasaun AFC Asian Cup 2027 iha Darwin-Austrália.
Treinadór Prinsipál Selesaun Nasionál Timor-Leste, Zé Pedro konfesa Gali Freitas labele haforsa ekipa Lafaek tanba jogadór husi Persebaya Surabaya ne’e hetan akumulasaun kartaun kinur rua.
Enkuantu, Mouzinho la permite atu hola-parte iha selesaun nasionál tanba kondisaun fízika ne’ebé la permite nune’e presiza deskansa.
“Jogadora na’in-rua ne’e importante ba ekipa maibé situasaun mak nune’e. Más, ha’u fiar jogadór seluk bele substitui ho auzénsia Gali ho Mouzinho,” Zé Pedro infroma ba TATOLI iha edifísiu Federasaun Futeból Timor-Leste (FFTL), Bairros dos Grilos, Kuarta ne’e.
Notísia relevante: Zé Pedro lakohi promete bainhira kontra Tazaskistaun
Zé Pedro kompromete hadi’a di’ak liután kualidade ekipa mezmu Timor-Leste laiha ona oportunidade atu hakat bá AFC Asian Cup 2027 ne’ebé sei realiza iha Arábia Saudita.
Antes ne’e, lista jogadór na’in-23 ne’ebé selesionadu iha ekipa nasionál kompostu husi Dylan José Nisk, Georgino Mendonça, Junildo Pereira, Ryan Zom, Anizo Correia, Francisco da Costa, João Soares, Filomeno da Costa, Nelson Viegas no Mário Quintão, Santiago da Costa, Kornelis Nahak, Marques de Carvalho, Fretiliano Santos, Ejivanio da Costa, Cláudio Osório no Zenivio Mota, Paulo Freitas (Gali), João Pedro, Mouzinho de Lima, Zion Cruz, Vabio Pires no João Rangel.
Jornalista: Natalino Belo
Editór: Xisto Freitas da Piedade
