DILI, 11 Novembru 2025 (TATOLI)–Prezidente Komité 12 Novembru Ein-Ezersísiu, Filipe Rodrigues hateten Masakre Santa Krús hanesan rezisténsia boot hosi joven sira, tanba ne’e presiza banati tuir eroi sira-nia istória ba luta libertasaun nasionál.
“Istória hatudu katak Masakre Santa Krús hanesan rezisténsia boot ida husi joven sira iha sidade laran. Husi joven sira-nia movimentu iha sidade laran dada militár Indonézia husi foho tun-mai fali sidade, hodi tau-matan ba joven sira iha sidade laran. Husi masakre ida-ne’e mak lori vitória boot ba ita-nia prosesu luta libertasaun nasionál hodi hamosu virajen boot no loke mundu internasionál nia matan,” nia dehan iha kalan reflesaun ba Loron Nasionál Juventude ba da-20 no komemorasaun Masakre Santa Krús ba da-34, iha Semitériu Santa Krús, Dili, Tersa ne’e.
Nia haktuir katak reflesaun ne’e atu lori ema hotu bele hanoin filafali importánsia husi movimentu juvenil liga ho semitériu Santa Krús.
Iha fatin hanesan, Sekretáriu Estadu Arte no Kultura, Jorge Soares Cristovão husu ba joven sira atu hamutuk hodi luta ba libertasaun povu no dezenvolvimentu nasaun nian.
“Hanesan joven kontinuadór ita presiza hamutuk hodi luta ba libertasaun pátria no dezenvolvimentu nasaun, hanesan ita-nia aman sira uluk luta hodi termina independénsia,” nia dehan.
Govenante ne’e mós husu ba jerasaun foun sira atu estuda no aprende husi joven sira uluk, atu kontribui ba dezenvolvimentu nasaun.
Entretantu, Padre Joaquim Sarmento, ne’ebé dirije reflesaun ne’e koloka pontu importante rua.
“Reflesaun ida-ne’e, ita sei reflete buat rua. Dahuluk, komemorasaun loron Masakre Santa Krús tanba fatin ida-ne’e sai ona santuáriu ki’ik ida iha ita-nia rai iha tinan 34 liu bá no daruak mak selebra Loron Nasionál juventude,” nia subliña.
Padre esplika, komemora katak fó rekoñesimentu ba eventu importánsia iha moris no selebra katak halo atividade espesiál ruma hodi foka ba aspetu pozitivu sira.
“Ohin ita halo komemorasaun ba sira-ne’ebé mate sira no komemora juventude uluk nia luta hodi selebra juventude ohin loron nia kontribuisaun ba dezenvolvimentu nasaun,” Padre Joaquim haklaken.
Nia hatete tuir Evanjellu Jezúz katak se fini musan ida la monu ba rai no mate karik nia sei hela mesak, maibé se nia mate sei moris fali hodi fó fuan barak.
“Ida-ne’e reflete ba komemorasaun Masakre Santa Krús katak husi joven sira-nia aten brani no fakar raan ba ita-nia rai Timor-Leste, hodi kuda fini husi jerasaun ba jerasaun,” Amu Joaquim subliña.
Amu ne’e solisita jerasaun foun sira labele sai jerasaun fraka ne’ebé fásil atu rende lalais, maibé sai jerasaun ida forte atu banati tuir joven sira uluk nia ain fatin.
Jornlaista: Osória Marques
Editór: Xisto Freitas da Piedade
