PPN atribui prémiu liberdade expresaun Max Stahl 2025 ba Amito Qonusere Araújo
DILI, 11 Novembru 2025 (TATOLI)- Prezidente Parlamentu Nasionál (PPN), Maria Fernanda Lay, akompaña husi membru meza, reprezentante Bankada Parlamentár, Sekeratáriu-Jerál ho nia Adjuntu Sekretáriu-Jerál Parlamentu Nasionál, ofisialmente atribui sertifikadu rekoñesimentu no osan montante rihun $10 ba premiadu Amito Qonusere Araújo iha kompetisaun literásia prémiu liberdade expresaun Max Stahl.
Prémiu ne’e atribui iha loron 11 fulan-Novembru tinan 2025, iha sala konferénsia Parlamentu Nasionál nian.
“Ha’u lori Parlamentu nia naran parabeniza premiadu Amito, ne’ebé ho esforsu tomak bele ultrapassa kritériu sira ne’ebé iha. Iha área liberdade expresaun nian. Kompetisaun ne’e Parlamentu Nasionál realiza ba dala tolu ona, ho objetivu atu bolu hikas sosiadade sira, epsesialmente juventude sira nia hanoin ba importante liberdade expresaun iha Timor-Leste, nu’udar pilar importante iha Estadu Demokrátika nian, liuhusi hakerek, maibé ho validasaun ne’ebé aas, kuidadu no ho responsabilidade”, dehan Prezidente Parlamentu Nasionál ne’e.
Prezidente PN ne’e Dehan, Timor-Leste adere ona ba ASEAN, presiza tebes joven sira-nia kontribuisaun liuhusi literasia iha área liberdade expresaun nu’udar dalan ida ba rezolve dezafiu no partilla mós informasaun ba nasaun seluk hodi bele hadi’ak nasaun nune’e mós kontribui ideia ba nasaun ASEAN seluk ne’ebé presiza.
Tanba ne’e, Prezidente dezeja katak tinan oin kandidatu sira bele barak liu tan nune’e bele kompete iha prémiu ida-ne’e.
Alénde atribui rekonesimentu ba premiadu, PPN atribui mós sertifikadu rekoñesimentu ba juri sira nu’udar símbolu kontribuisaun iha área liberdade expresaun nian.
Premiadu ba prémiu liberdade expresaun Max Stahl tinan 2025, Amito Qonusere Araújo, sente haksolok no konsidera prémiu ne’e hanesan resposabilidade boot iha nia karreira.
“Ha’u sente kontente, maibé ida-ne’e nu’udar responsabilidade boot ida. Ita tenke garante liberdade espresaun, maibé ho responsabilidade no étika”, hateten premiadu ne’e ba Ajénsia TATOLI.
Prémiadu ne’e mós husu ba sidadaun tomak, liu-liu joven sira atu kontinua promove literasia hodi prezerva memória luta ba libertasaun nasionál, no informasaun seluk ne’ebé kontribui ba komunikasaun nian.
“Ha’u husu ba hotu-hotu atu badinas hakerek no ko’alia, tanba ne’e garante ona iha Konstituisaun, maibé buat hotu tenke ho responsabilidade”, Qonusere enkoraja.
Ho prémiu ne’e, Qonusere promete esforsu hodi estabelese biblioteka ida hodi hamoris no promove literasia iha joven sira nia le’et liuliu iha Timor-Leste.
“Ha’u-nia mehi, ba futuru, hakarak loke biblioteka no kontinua peskiza ba istória luta libertasaun nasionál, hodi produs livru, nune’e memória hotu labele lakon maske la’o neneik,” nia promete.
Notísia relevante: Amito Qonusere Araújo sai manán-na’in Prémiu Max Stahl ba tinan 2025
TATOLI
