DILI, 05 Novembru 2025 (TATOLI)–Ministru Defeza Kontra Almirante Donaciano do Rosário da Costa Gomes ‘Pedro Klamar Fuik’ konsidera akordu kooperasaun ne’ebé asina ho Governu Malázia ne’e ho objetivu atu intensifika dezenvolvimentu forsa.
“Koooperasaun iha domíniu defeza kooperasaun ne’e nu’udar kooperasaun internasionál ne’ebé mak ita sente ita tama iha ASEAN. Tanba ne’e, Ministériu Defeza Timor-Leste no Ministériu Defeza Malázia asina akordu ne’e atubele intensifika koperasaun iha ámbitu dezenvolvimentu forsa,” Ministru hateten ba Jornalista sira hafoin partisipa iha aprezentasaun no debate ba Orsamentu Jerál Estadu (OJE) OJE 2026 iha faze jeneralidade ba loron dahuluk nian, iha Sala Plenária Parlamentu Nasionál, Kuarta ne’e.
Nia dehan, kooperasaun ne’e nu’udar kooperasaun internasionál dahuluk Timor-Leste iha nível ASEAN hafoin Timor-Leste nia adezaun ba asosiasaun rejionál.
Notísia relevante : Ministru Defeza Timor-Leste no Malázia asina akordu kooperasaun militár
Governante ne’e esplika, kooperasaun ne’e ba setór hotu ne’ebé relasiona ho militár sira-nia kapasitasaun, formasaun no ekipamentu militár iha área nesesáriu.
Antes ne’e, iha loron 31 Outubru 2025, iha ámbitu enkontru Ministru Defeza ASEAN nian ba dala-19 ne’ebé hala’o iha Malázia foin lalais ne’e, Ministru Defeza Timor-Leste Kontra Almirante Donanciano do Rosário da Costa Gomes ‘Pedro Klamar Fuik’ hamutuk ho Ministru Defeza Malázia, Mohamed Khaled Nordin asina nota entedimentu hodi haforsa kooperasaun biliterál Timor-Leste no Malázia iha domíniu Defeza.
Nota kooperasaun ne’e foku liu ba iha instrumentu jurídiku iha domíniu Defeza nian ne’ebé foku ba buat haat hanesan diálogu no estratejia regulár, reforsa kapasidade FALINTIL-Forsa Defeza Timor-Leste (F-FDTL) no forsa Malázia, oinsá militár rai rua ne’e bele hametin kooperasaun iha área domíniu defeza nian liuhusi interkámbiu, siénsia teknolojia no indústria defeza.
Jornalista : Natalino Costa
Editora : Julia Chatarina
