DILI, 14 Novembru 2025 (TATOLI)—Xefe Estadu Maiór Jenerál Forsa Armada (XEMGFA) Tenente Jenerál Domingos Raul ‘Falur Rate Laek’ konsidera, suspensaun Forsa Tarefa Konjunta halo misaun umanitária iha Filipina ne’e hanesan desizaun polítika Governu nian, tanba ne’e husi parte Komandu FALINTIL-Forsa Defeza Timor-Leste (F-FDTL) tenke submete.
“Agora ne’e desizaun polítika, ne’ebé ita labele ko’alia buat ida. Ita-boot sira haree husi Ministru Negósiu Estranjeiru halo tiha konferénsia imprensa no Ministru Defeza halo ona klarifiksaun, nia rezultadu mak ne’e. Agora Militár ne’e ezekutór, hein de’it saida mak sira fó mai ita, ita halo de’it,” Falur hateten ba Jornalista sira iha nia knaar fatin, Kuartel Jenerál F-FDTL, Fatuhada, Sesta ne’e.
Notísia relevante : Ministru Defeza klarifika suspensaun Forsa Tarefa nia misaun umanitária iha Filipina
Iha loron iha Kuarta (06/11) liuhusi reuniaun Konsellu Ministru estraordináriu aprova projetu Rezolusaun Governu ne’ebé autoriza, iha kuadru konstitusionál no legál, partisipasaun husi F-FDTL iha misaun ba apoiu umanitáriu no protesaun sivíl iha Repúblika Filipina.
Governu nia desizaun bazeia ba kompromisu internasionál ne’ebé Timor-Leste halo iha ámbitu Nasaun Unida no Asosiasaun Nasaun Sudeste Aziátiku (ASEAN), inklui despozisaun husi Lei Defeza Nasionál no Estatutu Orgániku F-FDTL nian, ne’ebé fó lejitimidade ba Forsa Armada hodi partisipa iha misaun umanitária no emerjénsia sira, iha kooperasaun ho nasaun sira seluk no organizasaun internasionál sira.
Nune’e, iha loron Tersa (11/11) foin lalais ne’e, liuhusi parada militár jerál, Governu halo serimónia despedida ba kontinente Forsa Tarefa Konjunta na’in-150 ne’ebé sei halo misaun umanitária iha Filipina.
Tuir planu, kontijente sira sei desloka bá Filipina iha Sesta (14/11) faze dahuluk no Sábadu (15/11) faze daruak maibé la konsege.
Jornalista : Natalino Costa
Editora : Julia Chatarina
