DILI, 06 Novembru 2025 (TATOLI)—Ministra Saúde, Elia dos Reis Amaral, rejeita intervensaun ne’ebé deputadu sira ko’alia iha diskusaun loron daruak debate jeneralidade Orsamentu Jerál Estadu (OJE) 2026 kona-ba servisu saúde kolapsu tebes.
“Iha intervensaun depatu barak mak ko’alia dehan servisu saúde ne’e kolapsu, ha’u hanoin ida ne’e la loos,” Ministra Saúde, Elia dos Reis Amaral, hateten iha debate OJE 2026 iha PN, ohin.
Tanba, nia dehan, bainhira mosu kolapsu signifika profisionál pesoál saúde sira para hotu ona no laiha atendementu ba pasiente sira.
“Maske Ministériu Saúde enfrenta problema hanesan menus rekursu umanu no ai-moruk hotu (stock out) kuazé 38%, maibé ho funsionáriu públiku, kontratadu no programátiku konsege halo atendementu ho di’ak,” nia hateten.
Enkuantu, intervensaunnsira ne’e hato’o husi deputada bankada FRETILIN, Nurima Alkatiri inklui deputadu seluk katak OJE 2026 aloka osan ba saúde aproximadamente miliaun $138 ho 6% de’it, Governu koko atu justifika valór ida-ne’e ho relatóriu dehan servisu saúde la’o di’ak liután.
“Maibé ospitál nasionál relata katak menus fulan tolu, bebé mate iha inan nia kabun laran liu 100, ne’e foin akontese iha ospitál nasionál la konta ho ospitál no sentru saúde sira seluk,” nia hateten.
Aleinde ne’e, nia dehan, Governu mós relata katak fornesementu ai-moruk di’ak liután kompara ho tinan sira liubá kotuk, maibé iha ospitál to’o postu saúde kontinua halerik ba ai-moruk.
Jornalista : Alexandra da Costa
Editór : Cancio Ximenes
