VIKEKE, 06 Novembru 2025 (TATOLI)–Diretór Jerál Interinu Sekretaria Estadu Arte no Kultura (SEAK), João Fátima da Cruz enkoraja feto husi Munisípiu Vikeke atu kontinua prodús tais tanba tais mak patrimóniu kulturál.
“Kona-ba tais parte SEAK halo ona kooperasaun ho UNESCO, Ministériu Komérsiu no Indústria (MKI), Timor Aid, Fundasaun Alola no UN Women ne’ebé harii Rede Soru Tais iha munisípiu hotu-hotu inklui Munisípiu Vikeke. Objetivu atubele dezenvolve tais iha kada munisípiu,” João ba TATOLI iha Postu Uatulari, Munisípiu Vikeke, Kinta ne’e.
Notísia relevante: Tais nu’udar patrimóniu kulturál importante atu salvaguarda
Nia dehan Governu prepara hela atu enkaixa tais iha kurríku eskolár para estudante sira bele aprende liuhusi eskola, hodi estudante sira bele iha koñesimentu kona-ba prosesu prodús tais.
“Tan ne’e, grupu feto sira iha Munisípiu Vikeke atu kontinu soru tais. Kona-ba programa soru tais ne’e sai hanesan programa prioridade SEAK nian atu oinsá nafatin dezenvolve ita-nia inan-feton sira-ne’ebé soru tais,” nia subliña.
João hatutan parte Governu liuhusi SEAK ba tinan oin (2026) kontinua prevee orsamentu hodi tau-matan ba rede soru tais sira-ne’ebé eziste iha territóriu.
Jornalista: Vitorino Lopes da Costa
Editór: Xisto Freitas da Piedade
