DILI, 06 Novembru 2025 (TATOLI)–Tribunál Judisiál Primeira Instánsia Dili (TJPID), Kinta ne’e, kontinua halo julgamentu kona-ba kazu sekuestru no abuzu poder ne’ebé envolve husi arguidu na’in-tolu hanesan JXB, MdC, DNS.
Audiénsia julgamentu ne’e, prezide husi Juíz Kolektivu, Ana Paula, Ercilia de Jesus, José Maria, Ministériu Públiku reprezenta husi Prokuradór Aderito Tilman, arguidu sira hetan asisténsia legál husi Defensór Públiku Sérgio Dias Quintas.
Iha audiénsia julgamentu ne’e Tribunál koletivu prosesu rona depoimentu husi sasin Gastão Piedade ne’ebé hanesan Antigu Diretór Informasaun Servisu Nasionál Intelejénsia (SNI).
Iha sala julgamentu, sasin deklara katak, antes ne’e nia hanesan Diretór Informasaun iha SNI no daudaun hala’o knaar hanesan Xefe Departamentu iha Servisu Informasaun Polísia.
Sasin koñese katak arguidu na’in-tolu sira hanesan membru FALINTIL-Forsa Defeza Timor-Leste (F-FDTL) no momentu ne’ebá sira na’in-tolu destakadu hanesan intelijénsia. Momentu ne’ebá lezadu utiliza meius ida bosok, uza Jenerál sira-nia naran katak, Jenerál sira mak promete ba lezadu atu ba buka ema hodi foti osan, atu nune’e banhira iha rekrutamentu ba iha F-FDTL sira bele pasa.
Notísia relevante : Tribunál julga membru F-FDTL na’in-tolu ba kazu sekestro no abuzu podér
Sasin dehan tan, Jenerál balun la konkorda ho lezadu nia identidade ne’e tanba uza ema ida nia naran fa’an tun sae, ho nune’e ikus mai sasin simu orientasaun husi Diretór Jerál SNI atu buka tuir ema sira ne’e, atu bolu mai iha Polísia atu indentifika.
Sasin deklara, hafoin simu tiha orientasaun, nune’e momentu ne’ebá orienta Xefi Informasaun SNI ne’ebé xefia husi sasin momentu ne’ebá hodi orienta arguidu na’in-tolu atu indentifika ema ne’e hodi lori bá Polísia atu husu motivu saida mak nia halo hanesan ne’e.
Momentu ne’ebá arguidu na’in-tolu mak lori lezadu ba aprezenta no intelijénsia nia serbisu mak hatene de’it informasaun, tanba ne’e sasin konfirma ba lezadu no lezadu deklara motivu halo ida-ne,e tanba lezadu moris susar no atu hetan osan ho fásil mak uza Jenerál sira-nia naran hodi husu osan.
Arguidu sira-nia papél mak hatene de’it informasaun, kuandu konfirma informasaun ramata ona, tuir mai kabe ona ba parte investigasaun nian.
Sasin dehan, banhira arguidu sira lori lezadu ba Polísia, sasin la haree arguidu sira baku lezadu, maibé se baku lezadu iha fatin seluk sasin la iha koñesimentu, tanba depois sasin konfirma tiha motivu husi aktu, lezadu entrega ona ba parte investigasaun nian.
Momentu sasin konfirma motivu ba iha lezadu, sasin haree ema barak mak iha Polísia.
Sasin esklarese ba Tribunál katak arguidu sira-nia serbisu iha parte SNI ne’e tolu mak sira halo atu konklui informasaun ida, dahuluk sira rekolla informasaun husi mídia sosiál, daruak husi parte vítima, datoluk liuhusi Servisu Operasaun intelijénsia, tolu ne’e maka ikus mai sira konklui katak, lezadu nia aktu ne’e bosok, hodi haruka buka tuir lezadu atu konfirma kona-ba nia motivu.
Hafoin rona tiha sasin, Tribunál adia julgamentu ne’e ba loron seluk hodi rona sasin sira seluk.
Jornalista : Natalino Costa
Editora : Julia Chatarina
