Timoroan ne’ebé hakarak faan medikamentu tenke hetan autorizasaun husi MS
DILI, 07 Novembru 2025 (TATOLI)—Inspetór Jerál Saúde Gabinete Inspesaun no Auditoria Saúde iha Ministériu Saúde (MS), Horacio Fernandes Ribeiro, apela ba timoroan ne’ebé hakarak faan medikamentu tenke hetan autorizasaun husi Ministériu Saúde.
“Timoroan sira-ne’ebé hakarak faan medikamentu tantu farmasia no importadór tenke obrigatoriamente husu autorizasaun ba Ministériu Saúde, nune’e kumpre rekezitu hotu-hotu foin livremente faan,” Horacio hateten ba jornalista sira iha edifisiu MS Kaikoli, ohin.
Nia dehan, ba sidadaun hirak ne’ebé halo negósiu ba ai-moruk herbal ilegál no faan subar, bainhira MS hetan la tolera no dekretu-lei atu regula sira sei iha faze diskusaun.
Durante ne’e seidauk iha dekretu-lei hodi kontrola sidadaun hirak ne’ebé faan ai-moruk herbal.
“Banhira sidadaun ida faan produtu herbal ne’ebé mak la rejistu, Ministériu Saúde hetan sei prende hotu no laiha toleránsia, sira barak mak faan subar,” nia hateten.
Nia hatutan, faan medikamentu tenke tuir nia-dalan atu nune’e labele fó impaktu la di’ak ba ema nia vida.
“Faan medikamentu tuir nia-dalan tanba medikamentu ne’e ita hemu tuir nia dalan tulun ita-nia isin atu di’ak. Bainhira hemu arbiru no rai arbiru medikamentu nia kualidade ne’e sai aat, entaun ita-hemu sai fali veneno. Tanba ne’e husu ba sidadaun sira faan medikamentu karik, tenke hetan autorizasaun atu faan medikamentu tuir rekízitu ne’ebé mak iha, nune’e kualidade ai-moruk ne’e garante diak ba ita nia konsumidor sira,” nia esplika.
Nia subliña, Gabinete Auditoria Saúde mós halo inspesaun ba farmasia retallu ho farmasia importador, entaun farmasia importadór hotu-hotu antes atu importa medikamentu mai Timor tenke hetan lisensa husi MS.
“Medikamentu item saida de’it mak importa mai tenke hetan lisensa no hetan autorizasaun husi Ministériu Saúde, nune’e mós ba sira farmasia retallu, antes sira hetan lisensa tenke sosa medikamentu liu husi farmasia retallu sira,” nia hakotu.
Jornalista : Felicidade Ximenes
Editór : Cancio Ximenes
