DILI, 07 Novembru 2025 (TATOLI)–Tribunál Judisiál Primeira Instánsia Dili (TJPID), Sesta ne’e, liuhusi Juíz Titulár José Quintão ne’ebé Titulár, hasai despaisu hodi aplika medida koasaun Prizaun Preventiva ba arguidu na’in-tolu VS, SRM no YGKS, ne’ebé suspeitadu ba krime furtu agravadu hodi sobu Jaco Store iha Fatuhada, foin lalais ne’e.
Juíz José Quintão hasai despaisu hodi aplika media Prizaun Preventiva ne’e, tanba iha indísiu sufisiente ba krime ne’ebé Ministériu Públiku imputa ba arguidu sira.
Tuir nota ne’ebé Ajénsia TATOLI asesu katak, durante interrogatóriu dahuluk ba kazu ne’e Ministériu Públiku promove arguidu sira ho krime furtu agravadu, ne’ebé previstu iha artigu 259 husi Kódigu Penál Timor-Leste.
Juíz José Quintão iha nia despaisu fundamenta katak, desizaun atu lori arguidu no arguida ne’ebé mak identifika ona bá fatin Estabelesimentu Prizionál hodi hein termu ikus inkéritu.
Notísia relevante : PNTL halo ona identifikasaun ba joven na’in-tolu suspeitadu sobu Jaco Store
Antes ne’e, suspeitu na’in-tolu halo asaun sobu Jaco Store iha Domingu (02/11) iha Fatuhada foin lalais, ne’ebé husi suspeitu sira nia hahalok ne’e konsege lori sai telemóvel husi loja laran.
Autoridade Seguransa hafoin akontesimentu, iha Segunda (03/11) buka tuir kedan suspeitu sira no konsege halo detensaun ba suspeitu sira hodi kumpre oras 72 detensaun, molok aprezenta ba Tribunál hodi halo interrogótoriu.
Jornalista : Natalino Costa
Editora : Julia Chatarina
