PNTL halo ona identifikasaun ba joven na’in-tolu suspeitadu sobu Jaco Store
DILI, 04 Novembru 2025 (TATOLI)--Komandu Polísia Nasionál (PNTL) liuhusi Diresaun Servisu Investigasaun Kriminál Nasionál (DSIKN), Tersa ne’e, maizumenus tuku 11:00 dadeer halo ona identifikasaun ba joven na’in-tolu ho inisiál SRM, VSdS no YGKS, ne’ebé suspeitadu sobu Jaco Store, iha area Fatuhada.
Kazu ne’e akontese iha Domingu (02/11) kalan, iha suspeitu na’in-tolu sobu loja ne’e hodi tama no foti subar telemóvel ne’ebé tau iha etalase laran.
Notísia relevante : Tribunál julga Teófilo Caldas ba krime maus tratus ba kaben
Iha sorin seluk, Komandante Munisípiu Dili Superintendente Xefe Polísia Orlando Gomes nia parte seidauk simu relatóriu relasiona kazu ne’e.
“Ha’u sidauk simu relatóriu,” Orlando hato’o ba Ajénsia TATOLI via telefónika.
Hafoin DSIKN halo tiha identifikasaun ba suspeitu na’in-tolu ne’e, rejistu kedan suspeitu sira ne’e nia hahalok ho Númeru Úniku Kriminál (NUC) 0349/25.PNSIC.
Jornalista : Natalino Costa
Editór : Evaristo Martins
