ATAÚRU, 8 novembro 2025 (TATOLI) – Komunidade Ataúru sujere ba Sekretaria Estadu Igualdade (SEI) atu fasilita formasaun kona-ba lideransa ba feto sira hodi prepara-aan wainhira Governu implementa Desentralizasaun Administrativa no Poder Lokál.
Sujestaun ne’e hato’o husi Alcina Batista, reprezentante feto, iha diálogu komunitáriu ne’ebé realiza iha findesemana ne’e iha Vila Maumeta, Ataúru.
“Sujere ba SEI atu fó formasaun kona-ba lideransa mai ami feto Ataúru nian, tanba daudaun ne’e ita-nia Governu prepara ona atu harii desentralizasaun ho nune’e ami hakarak husu atu fasilita formasaun ba ami oinsá atu lidera”, Alcina Batista hato’o sujestaun ne’e iha ámbitu selebrasaun Loron Nasionál Feto ba dala-49 iha Ataúru.
Nia dehan atu fasilita feto sira hetan oportunidade atu lidera Ataúru, liliu iha instituisaun públika no privada, SEI tenke fó kapasitasaun, tanba haree ba istória, feto sira iha illa ne’e seidauk iha susesu atu eleita hanesan xefe suku.
“Ami foin iha xefe aldeia na’in rua iha mandatu liu ba [anterior] ne’ebé ami husu iha formasaun mai ami, maibé labele de’it iha kapitál Ataúru nian, maibé tenke to’o nível suku no aldeia atu enkoraja feto maluk hodi kandidata-aan”, nia apela.
Alcina Batista husu ba SEI atu fó mós formasaun ba labarik feto Ataúru atu nune’e ba futuru bele lidera illa ne’e iha tinan sanulu mai.
“Fó mós formasaun ba ami nia oan sira ne’ebé mak sei iha nível ensinu báziku too sekundáriu, atu prepara no motiva sira para sira bele haree ba oin no labele kaben sedu, se feto mak kaben sedu se mak atu lidera rai ida ne’e”, nia informa.
Ideia hanesan hato’o mós husi reprezentante relijiozu, Anis Gomes, husu ba SEI atu ko’alia ho ministériu relevante atu fó bolsa estudu iha área parteira ba joven feto Atauru.
“Ita-nia oan sira durante ne’e seidauk hetan oportunidade bolsa estudu iha kursu parteira nomós ita-nia ema parteira lá iha, ho nune’e husu SEI hodi apoiu ba alin feto sira iha área ne’e”, nia sujere.
Iha fatin hanesan, Elia Barreto sujere atu kapasita feto Ataúru iha empoderamentu ekonómiku no SEI atu konvida feto potensiál sira atu partisipa no lori produtu lokál kompete iha nível nasionál no internasionál.
Hatán ba preokupasaun kona-ba partisipasaun feto Ataúru iha eventu internasionál, Sekretária Estadu tutela, Elvina Carvalho, hatete produtu lokál Ataúru hanesan bote sai sasin ba aprezentasaun kulturál iha serimónia formalizasaun Timor-Leste nian ba membru plenu Asosiasaun Nasaun Sudeste Aziátiku (ASEAN, iha portugés) ba dala-11, iha Kuala Lumpur, Malázia.
“Feto Ataúru iha abilidade boot hatudu ona iha ASEAN, atividade ne’e parte ida atu empodera no hakbiit ona feto”, nia informa.
Governante ne’e afirma, preokupasaun sira ne’e hotu SEI tau ona iha ajenda no promete sei halo advokasia oinsá atu promove di’ak liu tan feto sira liu husi formasaun lideransa.
Hatán ba preokupasaun kona-ba bolsu estudu Elvina Carvalho promete mós sei halo esforsu hodi ko’alia ho Fundu Dezenvolvimentu Kapitál Umanu hodi tau prioridade ba asuntu ida ne’e.
Notísia relevante: Loron Nasionál Feto: SEI fó omenjen ba eroína Maria Tapo
Jornalista: Ivonia Silva
Editora: Isaura Lemos de Deus
