ATAÚRU, 8 Novembru 2025 (TATOLI) – Sekretaria Estadu Igualdade (SEI) selebra Loron Nasionál Feto ba dala-49, ne’ebé selebra anualmente iha loron 3 Novembru, iha Ataúro, ho tema Feto Timor-Leste Selebra Ó Nia Direito Igualdade no Oportunidade.
Sekretária Estadu Igualdade, Elvina Carvalho, hatete eventu ida ne’e nia objetivu hodi hanoin hikas eroína Maria Tapo ho nia-feto maluk sira ne’ebé mate, tanba luta ba ukun rasik-aan iha tempu okupasaun estranjeira.
Governante ne’e haktuir, iha tempu ne’ebá bainhira eroína Maria Tapó mate, Komité Sentrál Frente Revolucionária de Timor-Leste Independente foti desizaun hodi selebra Loron Nsionál Feto ne’ebé marka ho loron mate eroina nasionál ida nian, Maria Tapó, ne’ebé fó nia vida ba luta autodeterminasaun nasionál.
“Loron ne’e tenke selebra, tanba atu halo reflesaun ba jerasaun foun sira hodi bele luta ba oin, ho nune’e bele partisipa iha atividade hothotu di’ak liu tan, tanba liberdade ne’ebé agora ita hetan, feto maluk lubuk ida mak terus iha momentu ne’ebá no sai vítima ba torturasaun no violasaun oin-oin”, Elvina Carvalho informa ba jornalista sira iha Vila Maumeta, Ataúru.
Sekretária Estadu ne’e mós akresenta katak iha era ukun-aan ida ne’e feto barak hatudu ona sira sira-nia abilidade no kapasidade hodi kontribui ba dezenvolvimentu Timor-Leste, liu husi knaar no servisu iha área oin-oin.
Iha fatin hanesan, Represente Embaixada Austrália iha Timor-Leste, Felicity Errington, kompremete no kontinua fó apoio ba planu no polítika Governu nian hodi promove feto.
“Ami iha planu no programa barak hodi servisu hamutuk ho Timor-Leste hodi tulun feto sira ne’ebé hetan problema no promove igualdade jéneru”, nia promete.
Presidente Autoridade Atauru, Mateus Belo, apresia SEI ne’ebé hili ona Ataúru hodi selebra Loron Nasionál Feto ho populasaun sira iha illa referida, “ida ne’e hanesan orgullu ida”.
“Ho atividade sira hanesan ne’e, bele rona feto sira nia preokupasaun liga ba dezenvolvimentu iha Ataúru,” nia haktuir.
Eventu ne’e konta ho misa agradesimentu, kari ai-funan no diálogu komunitária, no hetan partisipasaun husi reprezentante liña ministeriál sira, Embaixada Austrália, autoridade lokál no komunidade sira iha illa referida.
Notísia relevante: Loron nasionál feto sei komemora iha Ermera
Jornalista: Ivonia da Silva
Editora: Isaura Lemos de Deus
