UNFPA entrega laptop haat ba INETL hodi fasilita servisu TLDHS 2025
DILI, 10 Novembru 2025 (TATOLI)—Fundu Nasaun Unida ba Populasaun (UNFPA) iha Timor-Leste entrega laptop haat ba Institutu Nasionál Estatístika Timor-Leste (INETL), hodi fasilita servisu atu edita Demografia Saúde iha Timor-Leste ka Timor-Leste Demographic and Health Survey (TLDHS) 2025.
“Laptop sira-ne’ebé ami entrega la’ós de’it ekipamentu, maibé esforsu ida atu INETL prodús dadus ho kualidade kona-ba saúde inan no oan ne’ebé sei orienta polítika no programa nasaun nian ne’ebé ho objetivu atu hadi’a saúde feto nian,” Reprezentante UNFPA iha Timor-Leste, Navchaa Suren, hateten ba jronalista isra iha Kaikoli, ohin.
Dadus ne’e sei hatudu extensaun nesesidade planeamentu familiár ne’ebé seidauk satisfás entre feto sira, prevalénsia isin-rua iha idade ki’ik tebes entre labarik-feto sira, grau empoderamentu feto nian no asuntu barak seluk tan.
Objetivu husi Demografia Saúde iha Timor-Leste, atu dezenvolve hanesan define ona iha nível mundiál, hakarak hadi’a saúde populasaun nian, saneamentu báziku no asesu ba bee-moos, nune’e mós hakbiit feto sira liuhusi redusaun ba dezigualdade jéneru nian.
“Iha UNFPA, ami sente orgullu ho ami-nia parseria ne’ebé naruk no konfiável ho Governu liuhosi INETL no Ministériu Saúde. Ami sei kontinua apoia prosesu ne’e to’o dadus hotu prosesa, analiza, disemina no importante liu uza iha planeamentu setór saúde,” nia esplika.
Responsável ne’e hatutan, UNFPA iha nafatin kompromisu atu fó apoiu ba Governu Timor-Leste liuhusi INETL hodi garante rekolla dadus saúde ho kualidade aas iha tempu ne’ebé loos.
“Ami fiar katak laptop sira-ne’e sei kontribui maka’as ba hasa’e INETL nia kapasidade hodi prosesa dadus demografia saúde nian. Ami hein ba kontinuasaun husi ami-nia parseria no susesu iha implementasaun. Ami-nia esforsu hodi prodús dadus demografia ho kualidade aas, ne’ebé sei salva feto no joven feto sira-nia vida iha Timor-Leste,” nia subliña.
Iha fatin hanesan, Prezidente Institutu Nasionál Estatístika, Elias Ferreira, relata ohin sira simu laptop haat husi UNFPA hodi edita dadus husi levantamentu saúde demográfika Timor-Leste nian iha nível territoriál.
“Levantamentu ne’e rasik kuaze 35% hotu ona no ami hein katak levantamentu husi loron 23 Dezembru bele finaliza,” Elias Ferreira hateten.
Prezidente ne’e relata, laptop haat ne’e sufisiente atu edita dadus levantamentu saúde demográfiku iha Timor-Leste.
Jornalista : Felicidade Ximenes
Editór : Cancio Ximenes
