Governu hatuur fatuk dahuluk ba konstrusaun edifísiu Kuartel Jerál PNTL
DILI, 12 Novembru 2025 (TATOLI)–Governu liuhusi Primeiru-Ministru (PM), Kay Rala Xanana Gusmão, akompaña husi Ministru Interiór, Francisco da Costa Guterres, Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa no Embaixadora Xina iha Timor-Leste, Wang Wengli hamutuk entidadade relevante seluk, Kuarta ne’e, hatuur fatuk dahuluk ba konstrusaun edifísiu Kuartel Jerál PNTL foun.
Tuir planu edifísiu ne’e sei harii andar tolu, iha terrenu Kuartél Jerál PNTL iha Kaikoli, Dili, ho kustu $13.228.909,78, ne’ebé responsabiliza husi empreza Shanghai Construction Group Co, Ltd husi Xina.
Konstrusaun edifísiu ne’e ho durasaun loron-730 ka tinan-rua, ne’ebé obra ne’e tuir planu sei ramata iha tinan 2027.
Ho nune’e, Xefe Governu hamutuk ho entidade sira loke kuadru kontrusaun no asina tiha ai-rin konstrusaun ba edifisiu, no enjiñeiru sira tau ai-rin ba rai kuak nu’udar sinál katak konstrusaun hahú la’o ona.
Hafoin serimónia ne’e, PM Xanana husik kedan fatin no la konsege halo diskursu tanba iha ajenda balun iha Ministériu Finansa.
Notísia relevante : Membru PNTL ida suspetadu ba falsifikasaun dokumentu veteranu
Ministru Interiór, Francisco da Costa Guterres lori Governu nia naran, agradese ba entidade hotu ne’ebe serbisu hamutuk hodi dudu prosesu tomak no ikus mai konsege realiza kontrusaun ba edifísiu foun.
“Ha’u lori Primeiru-Ministru nia naran, hakarak agradese wa’in ba instituisaun sira hotu ne’ebé maka ajuda tebes Ministériu Interiór liuhusi PNTL, liuliu bele rezolve problema ida-ne’e hodi bele hahú fali konstrusaun ba edifísiu foun. Edifísiu ida-ne’e sei sai hanesan símbolu ida hodi PNTL serbisu ho profesionál ho disiplina,” Francisco hato’o iha Kuartél Jeral PNTL, Kaikoli.
Nia dehan, Governu sei kontinua tau orsamentu hodi bele harii edifísiu PNTL ho kualidade hodi Polísia sira bele halo serbisu ho dignu.
Edifísiu ne’e nia dezeñu hahú kedan iha tinan 2014 to’o 2017, maibé Governu iha tinan 2020 halo lansamentu hodi hatuur fatuk dahuluk.
“Iha tinan 2021 ita komesa hahú maibé difikuldade oituan iha ai-rin fundasi ba konstrusaun nian, entaun ita la konsege halo no iha tinan 2023 ita desde re-dezeña fali edifísiu Kuartél Jerál PNTL no ohin ita komesa halo lansamentu,” nia esplika.
Ministru iha biban ne’e agradese ba empreza Shanghai tanba apezar iha problema lubuk ida ne’ebé la’o kuaze tinan-ualu, maibé ikus mai konsege inisia konstrusaun.
“Ita konsege hahú fali ohin ne’e, sira mós kolabora tebes, ita konsege rezolve hodi hakat ba konstrusaun foun ida-ne’e. Nune’e mos, iha parte tékniku sira husi Ministériu Interiór no PNTL ne’ebe apoiu tebes hodi ita ajuda malu rezolve problema. Hakarak agradese mós ba Embaixadora Xina katak ho sira-nia tulun maka ohin loron ita konsege halo segundu lansamentu ba edifísiu PNTL nian,” nia tenik.
Nune’e, Governante ne’e husu ba parte hotu atu kolabora ho empreza hodi bele aselera konstrusaun.
“Ohin Primeiru-Ministru Xanana antes nia fila, fó hatene hela ba ha’u katak husu ita hotu atu apoiu empreza ne’e hodi aselera konstrusaun bele la’o ho di’ak,” nia katak.
Nune’e mós, Embaixadora Xina iha Timor-Leste, Wang Wengli iha esperansa projetu ne’e bele la’o ho susesu.
“Ha’u agradese no ondra ida bele partisipa iha lansamentu projetu konstrusaun edifísiu Kuartel Jerál PNTL. Ha’u hakarak hato’o agradesimentu kle’an no ha’u espera katak konstrusaun ida-ne’e bele la’o ho di’ak,” nia hato’o.
Embaixadora dehan, empreza Shanghai Construction Group nu’udar empreza husi Xina ne’ebé kaer ona projetu boot iha Xina no serbisu ho Governu lokál halo konstrusaun barak no konstrusaun ne’ebé empreza ne’e halo ho kualidade di’ak.
“Ha’u fiar katak Shanghai Construction Group sei halo projetu konstrusaun ho di’ak,” nia otimista.
Komandante Jerál PNTL, Komisáriu Jerál Polísia Henrique da Costa agradese ba parte hotu ne’ebé bele marka prezensa iha serimónia.
“Ida-ne’e hanesan oportunidade di’ak hodi marka istória ba Polísia Nasionál Timor-Leste hodi hatuur fatuk dahuluk ba konstrusaun edifísiu,” nia orgullu.
Jornalista : Natalino Costa
Editora : Julia Chatarina
