DILI, 13 Novembru 2025 (TATOLI)—Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) halo inspesaun ba estabelesimentu kosmetiku Balicom no ajensia viajen sira.
Notísia Relevante: Janeiru-Setembru, AIFAESA halo inspesaun ba operadór ekonómiku 3088
“Ita-nia foku inspensaun ne’e ba buat tolu ida mak massage, daruak mak estabelesimentu kosmetiku no ajensia viajen sira. Tanba ne’e mak ita atu kontrola sira-nia lisensiamentu komersiál no mós produtu kosmetiku sira-ne’ebé mak iha halo tratamentu ba ema nia isin,” Diretór Planeamentu Risku Aihan no Laboratóriu iha AIFAESA, Angelo Edmundo Belo hateten ba jornalista sira, iha Timor Plaza, ohin.
Nia hateten, husi inspesaun ne’e identifika iha probelma balun mak liuliu ba kosmetika sira-ne’ebé nia prazu liu ona, ida-ne’e mak ekipa foti ona nia prova sira hotu hodi konvoka sira atu ba aprezenta nia prosimentu sira.
“Klaramente katak produtu kosmetiku sira-ne’e nia kontein ho substánsia kimika ne’e normalmente iha, maibé substánsia sira-ne’e hotu mak ita haree nia limitsaun sira-ne’e ema autoriza ka lae/ Bainhira ita haree mak mosu problema sira iha durante ne’e, tanba produtu kosmetiku iha ema-nia rain ema sertifikasaun hotu, maibé ita iha nia rain ita seidauk halo sertifikasaun produtu no produtu hirak ne’e. Ita simu deit no sirkula deit ita-nia rai laran,tanba ne’e ba oin ami sei haree di’ak liu tan, nune’e kosmetiku sira-ne’e tau tuir ninia orijinalidade ,”nia afirma.
Nia relata, produtu kosmetiku ne’ebé mak ohin AIFAESA rekolla ne’e mai husi Nasaun Indonézia no Xina.
“Produtu sira-ne’ebé mak ita halo inspesaun hodi hetan ne’e mak ida liu prazu. Ida-ne’e ita sei halo destroisaun ida mak falta rekezitu hanesan laiha informasaun ruma, entaun ita foti sai tanba ita bele deskonfia produtu sira-ne’e falsifikasaun,” nia haktuir.
Iha fatin hanesan, Traballadór Balicom Timor Plaza, Cecilia Gonçalves Maia, rekoñese katak produtu kosmetiku ne’ebé mak ekipa aifaesa prende ne’e tanba balun liu ona prazu no balun la iha rekezitu ruma mak kontinua faan ba populasaun sira.
“Loos! Ami rekoñese katak sasán ne’ebé ekipa AIFAESA preende ne’e liu prazu no ami mós sei fó hatene ba empreza na’in hodi tau fila-fali informasaun sira-ne’e ba produtu hirak ne’e,” Cecilia Gonçalves Maia dehan.
Nia afirma, AIAESA prende produtu kosmetiku mak hanesan lipstick, Po (bedak), mina morin no seluk tan.
Jornalista : Felicidade Ximenes
Editór : Cancio Ximenes
