DILI, 13 Novembru 2025 (TATOLI)-Meza Parlamentu Nasionál (PN) simu ona proposta hamutuk 89 iha debate espesialidade ba proposta Orsamentu Jerál Estadu (OJE) 2026.
Prezidente Parlamentu Nasionál, Maria Fernanda Lay, fó sai proposta hirak ne’e tuir guiaun no sei halo diskusaun ba kada proposta hafoin tama artigu sira iha proposta lei OJE ne’e.
Nune’e, durante diskusaun proponente sira kada na’in-rua sei halo justifikasaun minutu tolu iha sesaun dahuluk no minutu ida iha daruak, hafoin diskusaun iha plenária no sekretária meza sei la lee justifikasaun proposta.
Deputada FRETILIN, Maria Angélica Rangel, dehan debate ne’e demokrátiku, nune’e husu diskusaun ho transparente atu povu bele asesu tanba orsamentu povu nian.
Deputada CNRT, Cedelízia Faria dos Santos, konkorda ho meza halo jestaun tempu, tanba rejimentu fó tempu diskusaun espesialidade iha loron sanulu de’it.
Tuir proposta hirak ne’ebé aprezenta, balun halo aditamentu, eliminasaun, husu halo redusaun orsamentu no seluk tan.
Proposta lei OJE ne’e iha artigu hamutuk ualu. Iha espesialidade, diskusaun no votasaun sei halo ba kada artigu. Termina iha diskusaun espesialidade kontinua votasaun iha finál globál.
Lembra katak, iha 07 Novembru, Parlamentu liuhusi reuniaun plenária estaordinária aprova ona proposta OJE 2026 ho montante $2.214.689,195 iha faze jeneralidade ho votu a favór 42, kontra 0 no abstensaun 23 husi FRETILIN no PLP.
Proposta OJE 2026 ne’e aloka ba saláriu no vensimentu $476.870.249, bens no serbisu korente $447.904.446, transferénsia públika $820.710.160, kapitál menór $32.556,96, no kapitál dezenvolvimentu $436.647.379.
Notísia relevante: PN aprova proposta OJE 2026 iha jeneralidade
Jornalista: Nelson de Sousa
Editora: Maria Auxiliadora
