DILI, 13 Novembru 2025 (TATOLI)—Primeiru-Ministru, Xanana Gusmão, aprova designasaun ba reprezentante Governu hodi lidera serimónia tinan-50 aniversáriu proklamasaun independénsia iha kada munisípiu sira.
Notísia Relevante: KM aprova tema ba selebrasaun loron proklamasaun independénsia RDTL ba da-50
Komemorasaun proklamasaun indepenénsia ba da-50 nian sei hala’o iha munisípiu hotu-hotu, iha Rejiaun Administrativa Espesiál Oé-Cusse Ambeno (RAEOA) no iha Ataúru, ho objetivu atu promove valór dame, solidariedade no demokrasia, hodi garante selebrasaun ida-ne’ebé ho karáter nasionál, partisipativu no besik ba populasaun.
Tanba ne’e. Primeiru-Ministru, Xanana Gusmão, liuhusi Despaixu nú. 023/PM/XI/2025, loron 07 Novembru 2025, nomeia membru Governu ne’ebé responsável atu reprezenta Ezekutivu iha serimónia ofisiál tinan ba da-50 Proklamasaun Independénsia nian, ne’ebé sei hala’o iha teritóriu nasionál tomak.
Normalmente serimónia sentrál sei hala’o iha Palásiu Governu Dili ho prezensa Vise-Primeiru-Ministru sira, Ministru Prezidénsia Konsellu Ministru, Ministru Finansa, Ministru Negósiu Estranjeiru no Kooperasaun, Administrasaun Estadu, Defeza no Interior, nomós ho Vise-Ministru Finansa, Asuntu ASEAN nian no Administrasaun Estadu, no Sekretáriu Estadu Igualdade, Komunikasaun Sosiál, Arte no Kultura, Dezenvolvimentu Rurál, Asuntu Toponímia no Organizasaun Urbana no Protesaun Sivíl nian.
Enkuantu iha munisípiu no rejiaun sira seluk, Governu sei hetan reprezentasaun husi ministru, vise-ministru no sekretáriu Estadu sira, tuir distribuisaun tuir mai ne’e:
Munisípiu Aileu sei reprezenta husi Governante Ministra Saúde, Elia Amaral, Vise-Ministru Fortalesimentu Institusionál Saúde nian no Operasionalizasaun Ospitál sira nian no Sekretáriu Estadu Formasaun Profesionál no Empregu, Rogério Araújo Mendonça.
Iha Ainaru, sei lidera husi Ministru Asuntu Kombatente Libertasaun Nasionál nian no Sekretáriu Estadu Veteranu, Jíl da Costa “Oan Soru”.
Ataúro, sei partisipa husi Vise-Ministru Asuntu Parlamentár, Adérito Hugo da Costa.
Iha munisípiu Baukau mós sei reprezenta husi Ministra Edukasaun, Dulce de Jesus Soares no Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál.
Iha Bobonaru sei lidera husi Ministru Justisa, Sérgio Hornai, no membru governu aira seluk hanesan Vise-Ministru Fortalesimentu Institusionál no Sekretáriu Estadu Terras no Propriedade.
Iha munisípiu Kovalima. sei prezide husi Ministru Komérsiu, Agio Pereira no Indústria no Vise-Ministru Komérsiu, Augusto Junior Trindade.
Iha munisípiu Díli nomeia Ministra Solidariedade Sosiál no Inkluzaun, Verónica das Dores no Vise-Ministra Solidariedade Sosiál no Inkluzaun, Céu Brites.
Iha munisípiu Ermera sei prezide husi Ministru Transporte no Komunikasaun, Miguel Gonçalves Manetelu.
Iha Lautein sei aprezenta husi Ministru Petróleu no Rekursu Minerál no Sekretáriu Estadu Kooperativa, Francisco da Costa Monteiro
Iha munisípiu Likisa sei prezide husi Ministru Ensinu Superior, Siénsia no Kultura, José Honório.
Iha munisípiu Manatutu sei reprezenta Ministru Planeamentu no Investimentu Estratéjiku, Gastão Sousa.
Iha Munisípiu Manufahi sei prezide husi Ministru Juventude, Desportu, Arte no Kultura Nelyo Isaac Sarmento.
Iha RAEOA, sei reprezenta husi Ministru Obra Públika, Samuel Marçal, Vise-Ministru Infraestrutura no Sekretáriu Estadu Eletrisidade, Bee no Saneamentu.
Iha munisípiu Vikeke. Ministru Agrikultura, Peska, Pekuária no Florestas, Marcos da Cruz no Sekretáriu Estadu Peska, Pekuária no Florestas nian.
Husi despaxu ne’e haruka membru Governu tomak ne’ebé nomeia ona, nomós ho dirijente sira Administrasaun Públika nian, atu partisipa ativamente iha atividade preparasaun no iha asaun públika ne’ebé asosiadu ho serimónia, inklui abertura feira no espozisaun, no atu kolabora ho Komisaun Organizadora Serimónia Ofisiál Komemorativa ba da-50 Proklamasaun Independénsia nian iha mobilizasaun populasaun ba partisipasaun luan iha nasaun tomak.
Jornalista : Alexandra da Costa
Editór : Cancio Ximenes
