OEKUSI, 14 Novembru 2025 (TATOLI) – Asosiasaun Halibur Defisiénsia Matan Timor-Leste (AHDMTL), rekomenda ba Autoridade Rejiaun Administrativa Espesiál Oekusi Ambeno (RAEOA) hodi apoia fatin, nune’e bele fasilita formasaun ba Ema ho Defisiénsia (EhD) sira iha Oekusi.
Diretór Ezekutivu AHDMTL, Gabriel Ponciano de Sousa, propoin nia rekomendasaun ne’e, iha ámbitu abertura formasaun ba Ema ho Defisiénsia (EhD) matan hamutuk na’in-20 iha ho matéria prinsipál mak letra Braille no teknolojia dijitalizasaun.
“Ita-nia fatin realiza formasaun iha Oekusi seidauk iha, ne’ebé ami fó fiar ba Autoridade RAEOA atu identifika fatin ida ba asosiasaun ne’e, atu hala’o nia atividade, no antes ne’e mós ami halo diskusaun ho Prezidente Autoridade ho ekipa sira, atu identifika fatin ida, ne’ebé ita espera nafatin ba futuru bele indika fatin ida, tanba agora iha ona prosesu nia laran, ne’ebé ami depozita ami-nia konfiansa ba RAEOA,” nia hateten.
Notísia relevante:EhD matan iha Oekusi benefísia kapasitasaun letra Braille no teknolojia dijitalizasaun
Nia informa, tanba planu ne’ebé AHDMTL esforsa, katak iha 2026 sei estabelese eskola ensinu rekorrente ida iha Oekusi tanba ho programa ekivalénsia ne’e, mak sei tulun tebes maluk defisiénsia sira la’ós matan de’it maibé defisiénsia ho tipu hothotu, atu bele asesu formasaun iha fatin ne’ebé séguru.
Hatan ba rekomendasaun ne’e, Xefe Departamentu Finansa no Rekursu Umanu iha Diresaun Rejionál Edukasaun no Solidariedade Sosiál, Cebastião Icu, rekoñese preokupasaun husi AHDMTL kona-ba rezidénsia tanba Ema ho Defisiénsia matan iha Oekusi, tuir dadus ne’ebé serbisu sosiál rekolla kuaze 200 mak seidauk hetan formasaun ruma.
“Ami hatene difikuldade primeiru mak fatin, dezde 2024 parte Diresaun Rejionál Edukasaun no Solidariedade Sosiál, simu ona karta ida ho pedidu husu fatin. Ami mós envia ona karta ne’e ba terra no propriedade, ne’ebé agora sei iha faze identifikasaun. Ita espera iha tempu-badak bele hetan ona fatin ida atu serbí ba asosiasaun AHDMTL. Ami mós kontinua koordena ho sira, maibé dehan sei iha prosesu faze identifikasaun,” nia hateten.
Notísia relevante:AHDMTL hakarak kria sentru formasaun ba ema ho defisiénsia matan iha Oekusi
Jornalista: Abílio Elo Nini
Editór: Rafael Ximenes de A. Belo
