Governu aprezenta ba PN planu pós-adezaun TL ba ASEAN

DILI, 14 Novembru 2025 (TATOLI) – Governu aprezenta ba Parlamentu Nasionál, iha ámbitu diskusaun proposta Orsamentu Jerál Estadu (OJE) 2026, planu pós-adezaun Timor-Leste (TL) ba Asosiasaun Nasaun Sudeste Aziátiku (ASEAN, sigla inglés).

Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, hateten dokumentu ne’e hanesan vizaun estratéjika planu asaun anuál pós-adezaun atu implementa ba akordu fasilitasaun komérsiu no prepara kompromisu sira ne’ebé iha área subsídiu peska iha ASEAN.

“No akordu boot tratadu fasilitasaun ida mak Asean Trade in Goods Agreement (ATIGA) ne’ebé asina husi líder 11 foin daudaun iha 16 Outubru iha ita-nia adezaun ba ASEAN. Pontu ida-ne’e importante tebetebes’’, nia responde ba deputadu sira iha Parlamentu, ohin.

Aleinde akordu ba tarifa, iha mós kuadru kona-ba  serbisu ho seluk tan.

Notísia relevante: https://tatoli.tl/2025/10/15/vise-ministra-milena-rangel-aprezenta-planu-pos-adezaun-tl-ba-periodu-2026-2030/

Orsamentu ba MKAE prioriza ba implementsaun programa pós-adezaun ba OMK

Kalbuad Lay  aprezenta mós Ministériu Koordenadór ba Asuntu Ekonómiku ninia proposta OJE  2026 ho montante $8.874.311 hodi aloka ba saláriu no vensimentu $1.724.311, bens no serbisu millaun $2, transferénsia públika rihun $150, no kapitál dezenvolvimentu millaun $5.

Nia justifika verba ida-ne’e hodi aloka ba atividade prioritária ba implementasaun programa pós-adezaun ba Organizasaun Mundiál Komérsiu (OMK) no ASEAN, koordenasaun ho liña ministeriál, no  formasaun ba setór privadu ba área ekonómika.

Aleinde ne’e, disemina ho parte interasada kona-ba lejizlasaun no kompromisu pós-adezaun OMK atu asegura no koordena sinerjia serbisu ba integrasaun iha ASEAN iha setór ekonómiku, apoiu implementasaun pós-adezaun ba OMK.

Tuir livru proposta OJE 2026, MKAE iha Programa Funsionamentu no Dezenvolvimentu Institusionál ho subprograma ida no atividade haat.

Programa Investimentu no Diversifikasaun Ekonómika ho subprograma rua, polítika ekonómika, pós-adezaun ba Organizasaun Mundiál Komérsiu (OMK) no koordenasaun asuntu ASEAN iha pilár ekonómiku ho atividade haat.

Notísia relevante: https://tatoli.tl/2025/11/14/orsamentu-616-004-ba-vpm-pasa-foku-ba-atrai-investidor/

Jornalista: Nelson de Sousa

Editora: Maria Auxiliadora